د رئیس پيژندنه - د افغانستان د علومواکاډمي

د رئیس پيژندنه

د افغانستان د علومو  د سرپرست رئيس ښاغلي څېړنوال دكتور عبدالظاهر شکېب لنډه پېژندنه :

دکتور عبدالظاهر شكېب ، چې له اصلاً  دكونړ ولايت د دانگام ولسوالۍ دى ، په ۱۳۵۶لمريز كال د حمل په ۱٣ مه نېټه دكندوز ولايت د دشت ارچي ولسوالۍ د حاجي زرغون په كلي كې زېږېدلى دى، خپلې لومړنۍ زده كړې يې د کډوالۍ پر مهال تر شپږم ټولگي پورې د كوزې پښتونخوا د ديرضلعې د جندول  د تور كلا  د حضرت عمرفاروق په لومړني ښوونځي كې كړي دي ، وروسته بيا په ۱۳۶۵لمريز كال دتېمرگرې د محمديې لېسې په اووم ټولگي كې شامل شوى ، تر دولسمه ټولګي پورې يې په همدغه ليسه کې درس ويلى او په ۱۳۷۱لمريز كال  د شهید مولوی حبيب الرحمن له  لېسې څخه فارغ شوى دى ، په همدغه يعنې ۱۳۷١لمريز كال د ننگرهار پوهنتون د ژبو او ادبياتو پوهنځي په پښتو څانگه كې شامل شوى ، او په ۱۳۷۵لمريز كال دځينو مشكلاتو له امله ترې پوهنتون په وروستي سمستر كې پاتې شوى دى ، وروسته په ۱۳۸۱ لمريز كال له نوموړي پوهنتون څخه دلېسانس په سويه په لومړۍ درجه فارغ شوى دى .


د  ۱۳۸٣لمريز كال  د حمل په ۱۸ نېټه د افغانستان د علومو اكاډمي په كادري ازموينو كې تر برياليتوب وروسته د پښتو څېړنو د بين المللي مركز علمي غړى شوى دى . په ۱۳۸۴لمريز كال يې د څېړنيار علمي رتبې ته ترفېع كړې او تر څنگ يې د كابل پوهنتون د ژبو او ادبياتو پوهنځي په پښتو څانگه كې د ماسترۍ پروكرام  هم تعقيب كړى او په ۱۳۸۶لمريز كال يې له كابل پوهنتون څخه د ماسترۍ سند ترلاسه كړى دى . په ۱۳۸۸ل كال   يې د څېړندوى علمي رتبې او  په ۱۳۹۳ ل كال يې د څېړنوال علمي رتبې ته ترفېع كړې ده . ښاغلي شكيب په ۱۳۸۴لمريز كال د پښتو څېړنو د بين المللي مركز دتاْليف او ترجمې انستيتوت آمريت دنده هم ترسره كړې او له ۱۳۸٦لمريز كال څخه تر  ۱۳۹٠ ل كال  پورې  د پښتوڅېړنو د بين المللي مركزعلمي منشي و.  له  ۱۳۹۲ ل  كال څخه تر دې مهاله  د افغانستان د علومو اكاډمي د اطلاعاتو او عامه اړيكو د رياست چارې  يې پر مخ بيولي دي  ، نوموړي په ۲۰۱۸ م  کال له پېښور پوهنتون څخه خپله دکتورا اخيستې ده .  

ښاغلى شکيب تر دې مهاله د بېلابېلو ادارو له خوا په تقديرنامو او ستاينليکونو هم مفتخر شوى او د افغانستان د اسلامي جمهوريت د جلالتمآب جمهور رئيس  د  ٢٦، ١٢ ،١٣٩٤ ل نېټې  د ١٦٣گڼې فرمان له مخې ورته د علامه سيد جمال الدين افغان عالي دولتي نښان هم ورکړل شوى دى. 

ښاغلى شكيب چې كله د پېښور پوهنتون د دكتورا دورې محصل و، نو د پېښور پوهنتون په تاريخ كې لومړى محصل دى چې د پوهنتون د علمي ژورنال د تحرير هيئت  غړى هم و.

ښاغلي شكېب د پوهنتون له دورې څخه تراوسه په لسگونو علمي- څېړنيزې مقالې ليكلي دي ، چې په كابل مجله، تكتو ، پښتو ، پيوټاج ،زيري جريده، عرفان مجله، د سولې هڅه مجله ، كونړ غږ مجله، سنځله مجله ، لمبه ، كندهار مجله، لوپټه او نورومجلو ،  اخبارونو او انترنيټ پاڼو كې نشرشوي دي او د ځينو ملگرو په گډون يې د پښتو – پښتو تشريحي قاموس  دوهم چاپ ، زاهد پښتو _ پښتو قاموس ، انگليسي - پښتو قاموس ، د آريانا دايرة المعارف او د خوشحال خټك دكلياتو په چمتو كولو كې هم ونډه اخيستې ده ، پر دې سربېره يې  تر لسو زيات مستقل  علمي _ څېړنيز آثار هم كښلي دي چې ځينې يې چاپ دى .

په درناوي

 

شماره تماس   
ایمیل آدرس