د نورستان په ولسي سندرو کې د واده د ځینو ناوړو دودونو غندنه
«علمي- څېړنیز کنفرانس»
...................................................................................................
کابل: د ژبو او ادبیاتو مرکز علمي غړې څېړنوالې عاطفې نورستانۍ «د نورستان په ولسي سندرو کې د واده د ځینو ناوړو دودونو غندنه» په نوم علمي- څېړنیز کنفرانس وړاندې کړ.
دغه کنفرانس چې د ۱۳۹۹هـ. ش کال د تلې میاشتې په ۱۴مه نېټه د دوشنبې په ورځ ترسره شوه، په کې لسګونو د علومو اکاډمي پوهانو ګډون کړی وو.
آغلې نورستانۍ د یادې موضوع په اړه وویل: نورستانۍ سندرې ټولنیزې سندرې دي، منځپانګه یې طبیعي، سوچه او پیغام رسوونکې ده. مېلمه پالنې، سخا او د نورستان پخوانيو لغتونو په کې انعکاس موندلی دی.
د نورستان سندرې مخکې له اسلام نه او وروسته له اسلام نه ډېر زیات توپیر لري، له اسلام څخه مخکې چې کوم موضوعات په کې و، اوس هغه موضوعات په دې سندرو کې نشته.
د نوموړې په وینا، نورستان لکه د هېواد د نورو سيمو او خلکو په څېر ښه دودونه هم لري او منفي دودونه هم چې د منفي دودونو له جملې څخه يو ناوړه دود يې دا دی، مخکې له دې چې ماشوم دنيا ته راشي، د هغوی د ودونو په اړه مخکې له مخکې تصميم نيول کېږي.
د کنفرانس په لړ کې آغلې نورستانۍ د واده په اړه د نورستان ځيني نظمونه د کنفرانس ګډونوالو ته واورول.
هغې وړانديز وکړ، دا چې د نورستان په ټولنه کې د ودونو دودونه ملا ماتوونکي دي، نو اړتيا ده چې په وړاندې يې مبارزه وشي.
