" د ګوَري ژبې فونولوژي" علمي- څېړنیز اثر چاپ شو
" د ګوَري ژبې فونولوژي" د څېړندوی شریف الله سانېن علمي- څېړنیز اثر دی چې په (۳۴۸) مخونو کې د افغانستان د علومو اکاډمي د اطلاعاتو او عامه اړیکو ریاست له خوا چاپ شو.
دغه علمي- څېړنیز اثر د لارښود استاد پر نظر، تقریظونو او سریزې سربېره په څلورو څپرکو کې بشپړ شوی دی. د دې علمي- څېړنیز اثر په لومړي څپرکې کې د موضوع پر شالید بحث شوې چې په کې د موضوع اړوند د بهرنیو او کورنیو پوهانو او څېړونکو د بېلابېلو آثارو تنقیدي بحث او یادونه شوې ده.
په دویم څپرکې کې د اندو- اروپايي ژبو په بحث کې د اندو- اروپايي ژبو د لنډې پېژندنې ترڅنګ د آریک ژبښاخ پر اندو- آریايي، آریاني او داردی ژبڅانګو پر ژبو لنډ بحث او معلومات وړاندې شوي دي.
په درېیم څپرکې کې په داردیک ژبو کې د ګوَري ژبې دریځ تر سرلیک لاندې د ګوَري ژبې پر پېژندنې او تاریخچې، د ګوَري ژبې په اړه د بهرنیو او کورنیو پوهانو پر نظریاتو او د هغوی د نظریاتو پر ارزونه، د ګوَري ژبې د ویونکو پر مېشتځایونو او د داردیک څانګې له پشه يي او نورستاني(کلښه الا) ژبو سره د ګوَري ژبې پر نږدېوالي بحث او څېړنه ترسره شوې ده.
په څلورم څپرکې کې د ګرامر لنډه تشـریح، توضیح او د ګوَري ژبې فونولوژي تر سرلیک لاندې د ګرامر په لنډې تشـریح او توضیح، غږپوهنې(Phonology)، فونیټیک(Phonetics)، د فونیټیک څانګې، د فونولوژي او فونیټیک ترمنځ توپیر، فونیم(Phoneme)، ګرافیم(Grapheme)، د فونیم او ګرافیم ترمنځ توپیر، الوفون، د ګوَري ژبې د فونیمونو(غږونو) پر ډولونو(خپلواکوVowels، بېواکوConsonants او نیم واکوSemi Vowels) او د دغو غږونو پر ځانګړنو، غبرګغږونو(Diphthongs)، بېواک مرکب غږونو(Clusters) او د ګوَري ژبې پر فونیمیکي الفباء علمي- څېړنیز بحثونه، څرګندونې او معلومات وړاندې شوې دي. په پای کې یې له معمول سره سم د څېړنې پایله، وړاندیزونه، ضمایم او مأخذونه راغلې دي.
د دې علمي – څېړنيز اثر د منځپانګې لومړي مخونه په لاندې لينک کې لوستلی او تر لاسه کولی شئ...
يادونه: دا کتاب د علومو اکاډمي له اطلاعاتو او عامه اړيکو رياست څخه په مناسبه بيه تر لاسه کولای شئ.
د اړيکې شمېره: ۰۲۰۲۲۰۱۲۷۹
