د امر بالمعروف او نهي عن المنکر د شکایتونو اورېدلو وزارت د قانون د تشریح او تطبیق په اړه لویه غونډه ترسره شوه
نن د چهارشنبې ورځ د ۱۴۰۳ لمریز کال د لړم/عقرب د میاشتې ۳۰مه نېټه د افغانستان د علومو اکاډمۍ د علامه احمد علي کهزاد د سیمینارونو او کنفرانسونو په تالار کې د امر بالمعروف او نهي عن المنکر د شکایتونو اورېدلو وزارت د قانون د تشریح او تطبیق په اړه لویه غونډه ترسره شوه، یاده غونډه د محترم قاري صاحب مطیع الله ستاري لخوا د قرآن کریم په څو مبارکو آیتونو پیل شوه.
د غونډې په پیل کې د علومو اکاډمي د ارشاد او دعوت ریاست رئیس مفتي محمد اکبر مقسط پرانستې وینا وکړه، ورپسې د امر بالمعروف او نهي عن المنکر او شکایتونو اورېدلو وزارت د پالیسۍ او مسلکي معینیت معین شیخ الحدیث مولوي محمد فقیر محمدي صاحب په اسلام کې د امر بالمعروف او نهي عن المنکر په ارزښت او د نوي قانون په اړه خبرې وکړې او د یاد قانون په یو شمېر مادو باندې د ناسمو تعبیرنو پر وړاندې د سم پوهاوي د رامنځته کولو د بحث غوښتنه یې وکړه او زیاته یې کړه چې دین یوازې د یوې ډلې او یو قوم نه دی، بلکې دا د ټولو مسلمانانو دین دی او باید ټول یې به ګډه باندې د ساتنې او تطبیق لپاره کار وکړو.
ښاغلي شیخ صاحب په خپلو خبرو کې دا هم وویل چې د هر نظام د تطبیق او ساتنې لپاره خپل قانون او اصول وي چې د هغې پر مټ د نظام ساتنه کېږي، نو د اسلامي نظام د تطبیق او ساتنې لپاره هم باید خپل قوانین او اصول شتون ولري چې د نظام ساتنه پرې وشي او عملي جامه ور واغوستل شي، نو په همدې بنا د امر بالمعروف او نهي عن المنکر وزارت د یو قانون مسوده جوړه کړه او د اميرالمؤمنین حفظه الله حضور ته یې وړاندې کړه چې په یو لړ سلسله مراتبو سره د عدلیې وزارت، د سترې محکمې، د افغاستان د علماء کرامو له شورا، د مرکزي دارالافتاء له خوا له پوره کره کتنې وروسته بیا د امیر المؤمنین په حضور کې ولوستل شوه او د تطبیق وړ وګرځېدله.
نوموړي ووی چې د دې قانون هره یوه ماده له قرآن، حدیث او فقهي قواعدو څخه اخستل شوې ده، یوه ماده یې هم د شریعت او اسلامي اصولو سره په ټکر کې نه ده. د افغانستان علماء کرام، پوهان او محققین کولی شي چې د دې قانون هره ماده ولولي او مطالعه یې کړې، هره ماده یې چې د شریعت او قانون مخالفه وي خپل نظر پرې وړاندې کړي او د امر بالمعروف وزارت سره یې شریک کړي.
وروسته د افغانستان د علومو اکاډمي د تفسیر او حدیث مرکز رئیس مولوي عرفان الله عرفان د غونډې اختتامیه خبرې وکړې او همداراز د امر بالمعروف او نهي عن المنکر وزارت له راغلي پلاوي څخه یې د راتګ مننه وکړه.
یاده غونډه د علومو اکاډمي د اسلامي بانکدارۍ مرکز د علمي غړي مولوي صاحب نور محمد محبي په دعائیې سره پای ته ورسېده.
