د محرقې د اپیډیمولوژۍ، تشخیصیه او درملیزو میتودونو بررسي
د افغانستان د علومو اکاډمي د طبیعي – تخنیکي علومو معاونیت د طب علومو مرکز علمي غړي ښاغلي څېړنوال ډاکتر عبد الرحیم وردګ د محرقې د اپیډیمولوژۍ، تشخیصیه او درملیزو میتودونو بررسي تر سرلیک لاندې علمي – څېړنیز سیمینار وړاندې کړ.
یاد کنفرانس د محرقې یا ټایفویید تبې د وباییزو فکټورونو، د ناروغۍ د لاملونو، کلینیکي نښو نښانو، تشخیصیه میتودونو، درملنې لارو او وقایوي تدابیرو د هر اړخیزې شننې په موخه ترسره شو.
ښاغلي وردګ صاحب وویل: محرقه د Salmonella typhi او Paratyphi له امله رامنځته کېدونکې یوه ساري او سیستمیکه ناروغي ده چې د ککړو خوړو او اوبو له لارې انتقالېږي او د وخت په تېرېدو له شدیدو اختلاطاتو لکه د کولمو سوری کېدل، وینې بهېدنه او د بدن د بېلابېلو غړو التهابي ناروغیو سبب کېدای شي.
کلینیکي بڼه یې متغیره ده، خو تبه، بطني درد، هضمي ګډوډي او عصبي نښې د دې ناروغۍ مهمې ځانګړتیاوې دي.
تشخیص د کلینیکي لوحې، لابراتواري ازموینو او د وینې یا نورو مایعاتو د کلتور له لارې یقیني کېږي.
د درملنې لپاره کینولونونه، درېیم جنرېشن سفالوسپورینونه، ازیټرومایسین او په شدیدو حالتونو کې کارباپینیم کارول کېږي، او وقایه د Ty21a او Vi CPS واکسینونو په مرسته تأمینېږي.
د غونډې په پای کې د حفظالصحې، د خوړو او اوبو د خوندیتوب، د خلکو د پوهاوي لوړولو او پر وخت تشخیص د اهمیت ټینګار وشو.
په پای کې یې له معمول سره سم د څېړنې پایله، وړاندیزونه او مأخذونه وړاندې شول او د څېړونکو، پوهانو او استادانو پوښتنو ته مقنع ځوابونه ورکړل شول او کنفرانس مثبت وارزول شو.
