د افغانستان د علومو اکاډمي د اتنوګرافۍ علمي – څېړنيز موزیم
د افغانستان د علومو اکاډمي د اتنوګرافۍ علمي – څېړنيز موزیم د افغانستان په کچه لومړنی اتنوګرافیک موزیم دی چې د کابل ښار په علومو اکاډمي کې موقعیت لري.
دغه موزیم د امیر عبدالرحمن خان د خور شاه بوبوجان په نوم قصر کې د ۱۸۸۰ – ۱۹۰۱ کلونو په اوږدو کې جوړ شوی دی چې دغه قصر په دوو پوړونو کې د تجربه لرونکو داخلي او بهرني، معمارانو او مهندسانو له خوا په مستطیل شکل جوړ شوی چې د قصر ښایست د ننداره کوونکو پام ځان ته را اړوي.
لکه څنګه چې په معاصر تاریخ کې راغلي چې د لومړي ځل لپاره عظمت لرونکي قصرونه په کابل او د افغانستان په نورو ښارونو کې په معاصره دوره کې جوړ شوي، دغه قصر هم د هماغې دورې په بې بېلګې سبک جوړ شوی دی.
دغه قصر د اروپا د رنسانس دورې په سبک له خښتو، خټو او لرګیو له ګچ څخه په استفادې رغول شوی، همدارنګه د قصر پر لرګیو کېندنې، د چت تزئینات او د دخولي دروازې پایې د دې قصر ښکلا لا زیاته کړې ده.
د وخت د جمهور رئیس د فرمان پر اساس دغه قصر په ۱۳۸۱هـ. ش کال کې د افغانستان د علومو اکاډمي علمي – څېړنیز موزیم ته ځانګړی شو .
د اتنوګرافۍ دغه موزیم ګڼ شمېر کمیابه فرهنګي او پخواني اتنیک آثار وروسته له پېژندنې راټول کړي او د دې آثارو په راټولولو کې يې نه ستړي کېدونکي زحمت او زیار ګاللی او په معياري توګه په مشخصو خونو کې تنظیم او نندارې ته ایښودل شوي دي.
د اتنوګرافۍ او هنر د برخې څېړونکو او ننداره کوونکو ته دغه آثار په درېیو برخو کې نندارې ته ایښودل شوي دي:
۱- د افغانستان اتنیک آثار
۲- د افغانستان لرغوني آثار (سکې)
۳- د مډرن هنر آثار چې د هنر د برخې څېړونکو ته ډېر ګټور دي.
د دې لپاره چې آثار په ښه توګه وپېژندل شي، نو آثار له معرفي او تشریح سره په مشخصو ویترینونو کې ایښودل شوي دي، ترڅو ننداره کوونکو او څېړونکو ته د افغانستان د مادي فرهنګ او د آثارو د تحول پېژندنې په هکله معلومات وړاندې شي.
د علومو اکاډمي د موزیم آمریت د موزیم معرفي، د اتنوګرافۍ تعریف او اهداف په یوه بروشور کې ترتیب کړي چې د ټولو مینه والو په خدمت کې دي، همدارنګه د موزیم په مهالنۍ کې د موزیم آثار معرفي او خپريږي. دغه راز د دې موزيم فعالیتونه د «موزیم تحقیقی و اتنوګرافی» په نوم فيسبوک پاڼې څخه خپريږي او لوستونکي کولای شي هغه لايک يا خوښ کړي.
دغه موزيم له پخوا څخه تراوسه پورې د ټولو هېوادوالو او بهرنيانو پر مخ خلاص دی او اوس هم ورڅخه هره ورځ لسګونه کسان ليدنه کوي.
دا موزيم ستاسو ټولو په خدمت کې دی!
