ستر مفسر او محدث ملا علي قاري هروي رحمه الله علمي او معنوي مقام
«علمي ـ څېړنيز سیمینار»
د چهارشنبې ورځ د ۱۴۴۶هـ ق کال د ربیع الاول په «۲۹مه» نېټه چې د ۱۴۰۳ ل کال د تلې میاشتې له «۱۱مې» نېټې سره سمون خوري د علامه احمد علي کهزاد د غونډو په تالار کې د تفسیر او حدیث مرکز له پلان سره سم د (ستر مفسر او محدث ملا علي قاري هروي رحمه الله علمي او معنوي مقام) تر سرلیک لاندې علمي ـ څېړنيز سیمینار دایر شو.
سیمینار د علومواکاډمۍ د قاري ښاغلي مطیع الله ستاري لخوا د قرآن کریم د څو مبارکو آیتونو په تلاوت سره پیل او ورپسې د علومو اکاډمۍ عمومي رئیس ښاغلي شیخ الحدیث مولوي فریدالدین محمود پرانېستې وینا او درنو میلمنو ته ښه راغلاست ووایه د خپلې عالمانه وینا په ترڅ کې یې د ملا علي قاري هروي رحمه الله مقام او منزلت بیان کړ.
د تفسیر او حدیث مرکز رئیس او د اسلامي امارت د عالي اداري کمیسیون غړي مولوي عرفان الله عرفان د قدرمن رئیس الوزراء پیغام د مجلس ګډونوالو ته وړاندې کړ، ورپسې د ارشاد، حج او اوقافو قدرمن وزیر ښاغلي څېړنپوه، قضاوتپوه شیخ دوکتور نور محمد ثاقب وینا وکړه؛ نوموړي په خپله وینا کې د علماو مقام او منزلت د بیان ترڅنګ د دیني علم اهمیت هم بیان کړ، د اسلامي امت د اسلافو یاد غونډې یې مهمې وبللې او هم د علامه ملا علي قاري رحمه الله له هرات څخه مکې ته د سفر په اړه هر اړخیز معلومات وړاندې کړل، همدارنګه د غونډې بل ګډونوال ښاغلي څېړنپوه محمد کبیر مشفق د (زنده ګي نامه ملاعلي قاري رحمه الله) تر عنوان لاندې خپله علمي ـ څېړنیزه مقاله وړاندې کړه، ورپسې د ارشاد، حج او اوقافو قدرمن معین ښاغلي شیخ مولوي عزیزالرحمن منصور وینا وکړه د وینا په ترڅ کې یې د علومو اکاډمۍ لخوا د دا ډول سیمینارونو دایرول یو لوی او مثبت ګام وګاڼه او دېته ورته د نورو پروګرامونو غوښتنه یې وکړه، د سیمینار په اوږدو کې ښاغلي څېړندوی محمد کریم ادیب د (ملاعلي قاري رحمه الله ټولنیز مقام) تر عنوان لاندې خپله څېړنیزه مقاله وړاندې کړه، همدارنګه د پوهنې وزارت په استازیتوب د اسلامي زده کړو معینیت د ظرفیت لوړونې رئیس ښاغلي مفتي عبدالولي سداد وینا وکړه د وینا په ترڅ کې یې د علماو مقام یاد او زیاته یې کړه؛ علماء دي چې ټولنې جوړوي او له برکته یې ټولنې د جهل له تورو تیارو څخه راوځي، د سیمینار په بله برخه کې د هرات پوهنتون محترم استاد پوهاند دوکتور فضل الرحمن فقیهي هروي(د میراث ملا علي قاري رحمه الله در محوری ترین علوم شریعت(چهاردانش: عقیده، تفسیر، حدیث وفقه اسلامي)) تر عنوان لاندې خپله څېړنیزه مقاله وړاندې کړه، همدارنګه د سیمینار نورو ګډونوالو هر یو د لوړو زده کړو قدرمن معین الحاج حافظ مولوي حبیب الله حامد او د ارشاد، حج او اوقافو معین قدرمن شیخ مولوي زر محمدحقاني ویناوې وکړې، همدارنګه ښاغلي څېړندوی دوکتور مولوي عبدالحق حبیبي د (مقام و منزلت ملا علي قاري رحمه الله درمیان مفسران) او د کابل پوهنتون محترم استاد قاري روح الله نجم (د ملا علي قاري رحمه الله د حدیثي خدمتونو) ترعنوان لاندې خپلې څېړنیزې مقالې وړاندې کړې، په پای کې د یاد سیمینار پرېکړه لیک ښاغلي څېړنپوه نورالحق عزیزي او د سیمینار ارزونه ښاغلي څېړنپوه سیدحبیب شاکر وکړه یاد سیمنیار یې مثبت و ارزاو او د سیمینار له مسولینو څخه یې مننه وکړه، یاد سیمینار د محترم مولوي عبدالروف فراهي لخوا د دعايې په لوستلو سره پای ته ورسید.