په ننګرهار کې ستروسو ته د زیان رسوونکو حشرو څېړنه

د علمي – څېړنیزې پروژې دفاع

څېړنوال دوکتور ګل شاه آرینوال په 1402/11/08 نېټې له خپلې علمي – څېړنیزې پروژې (په ننګرهار کې ستروسو ته د زیان رسوونکو حشرو څېړنه) بریالۍ دفاع وکړه.

یاده څېړنه چې د ننګرهار ولایت د پراختیايي وادۍ د فارم جدید (PHDC) د ستروسو په څېړنیز فارم کې ترسره شوې ده. نوموړي وویل ستروس په نیمه استوايي سیمو کې یوه ګټوره میوه ده، نه یواځې دا چې میوه یې خورا خوندوره او د ډول ډول ویټامینونو او عضوي تېزابونو درلودونکې ده، د دې ترڅنګ د چاپېریال د پاکوالي او ښکلا سبب هم ګرځي، خو له بده مرغه د ډېرو زیان رسوونکو حشرو او آفتونو له له لوري زیات زیان ورته رسېږي، په دې توګه اړینه ده چې په هکله يې لا ډېرې څېړنې وشي او زیان رسوونکې حشرې کنټرول شي.

محترم څېړونکي یادونه وکړه چې د ستروسو د زیان رسوونکو افتونو له ډلې د ستروسو کنې Citrus mites)، د ستروسو سیلا (Citrus psyllid)، د ستروسو تونل ویستونکی چینجی (Citrus leaf miner)، د ستروسو د پاڼو غوڅوونکی چینجی (Citrus caterpillar) او د ستروسو سپږۍ (Citrus aphids) د ننګرهار د ستروسو په باغونو کې ولیدل شوې چې له دې ډلې د ستروسو کنې (Citrus mites) او د ستروسو سیلا (Citrus psyllid) د ستروسو باغونه ډېر زیانمنوي.

د څېړنو پایلو وښودله چې د کنو د کنټرول لپاره د Pyridabin کنه وژونکو او د سیلا د کنټرول لپاره د Imadacloprid افت وژونکو 2.5 cc دوز اغېزمن ثابت شو. څېړونکي اړوندو ادارو ته رغنده وړاندیزونه وکړه. په پای کې د دفاع د ټاکلي کمیسیون له لوري دفاغ  د رایو په اتفاق مثبت وارزول شوه.