د نورستان په مرکز پارون کې د شفاهي ادبياتو او اسطورو تر سرليک لاندې بحث او علمي غونډه تر سره شوه.
په دغه غونډه کې د افغانستان د علومو اکاډمۍ عمومي رئیس څېړنپوه دکتور عبدالظاهر شکېب، په علمي او ټولنیزو چارو کې د ولسمشر سلاکار پوهاند دکتور لعل پاچا ازمون، په فرهنګي چارو کې د ولسمشر سلاکار محمد زرین انځور، د ننګرهار پوهنتون پخوانی رئيس پوهنوال ببرک مياخېل ، د علومو اکاډمۍ، کابل او ننګرهار پوهنتونونو يو شمېر استادانو او فرهنګيانوګډون وکړ.
په غونډه کې لومړی د نورستان والي ډاکټر عبدالغفور ملکزي خبرې وکړې د پلاي هر کلی يې وکړ او نورستان ولایت ته یې د ولسمشر د ځانګړې پاملرنې یادونه وکړه، ورپسې د افغانستان د علومو اکاډمۍ عمومي رئیس څېړنپوه دکتور عبدالظاهر شکیب د نورستان په تاریخ، فرهنګ اساطیرو او فولکلور او د فولکلور په ارزښت خبرې وکړې، ژمنه یې وکړه چې د علومو اکاډمي به په دې اړه يو شمېر پروګرامونه طرح کړي، چې د هېواد د دې تاریخي برخې مواد را ټول، و یې څېړي او تر نړیوالو یې ورسوي.
ورپسې د ولسمشر سلاکار محمد زرین انځور د نورستان په فولکلور او اساطیرو بحث وکړ.
پوهاند دکتور لعل پاچا ازمون هم د نورستان دودونه، اساطير او د فولکلور په اړه مفصلې خبرې وکړې او نورستانیان یې د فولکلور ټولولو او د فلکلور ټولوونکو سره مرستې ته وهڅول او تر څنګ يې د فولکلوري اثارو د چاپ ژمنه هم وکړه.
د ننګرهار پوهنتون استاد پوهنوال ببرک مياخېل د نورستان د خلکو په اړه پر روایتونو باندې خبرې وکړې. ورسته بيا محمداصف شينواري په نورستان کې د تعليم په برخه کې خپلې تجربې شريکې کړې.
د غونډې په پای کې د نورستان د ولایتي شورا رئیس او ځینو مخورو په ترتيب سره خبرې وکړې او له راغلي پلاوي يې مننه وکړه او د نورستان ځینې افسانوي او اساطيري کیسې یې د غونډې پر ګډونوالو ولورولې.
غونډه په دعايي پای ته ورسېده.
