د اکاډميسین سليمان لایق د جنازې مراسم ترسره او خاورو ته وسپارل شو
کابل: د هېواد د نامتو علمي، فرهنګي او اجتماعي شخصيت اکاډميسین سليمان لایق د جنازې مراسم ترسره او نن (د ۱۳۹۹لمريز کال د زمري ۲۱مه) په کابل ښار کې خاورو ته وسپارل شو.
نن سهار له ۸ څخه تر ۱۰:۳۰ بجو پورې د شهيد سردار محمد داود خان په روغتون کې د نوموړي د درناوي مراسم ترسره او بيا يې جنازه د کابل ښار په عیدګاه کې ادا شوه. وروسته د ده جسد د کابل په مرنجان غونډۍ کې خاورو ته وسپارل شو.
په دې مراسمو کې د هېواد لوړپوړو چارواکو، علمي- فرهنګي شخصيتونو، د ملي شورا غړو او د هغه مينه والو ګډون کړی و.
د هغه تر تدفين وروسته يو شمېر چارواکو، پوهانو او علماوو خبرې وکړې.
څېړندوی عبدالرحمن عادل د علومو اکاډمي په استازيتوب وويل چې اکاډميسین سليمان لايق په علمي – فرهنګي ډګر کې د سيمې په کچه ځلېدلې څېره وه چې زموږ د هېواد په فرهنګي غنامندۍ کې يې پوره رول درلود. د علومو اکاډمي د اکاډميسین سليمان لایق پر علمي، فرهنګي او ادبي خدمتونو وياړي.
د اطلاعاتو او فرهنګ نوماند سرپرست وزير محمد طاهر زهير، اکاډميسین لایق د هېواد پېژندل شوې علمي، فرهنګي او ادبي څېره ياد کړه او هغه ته يې د ابدي سوکالۍ هيله وکړه.
ده ژمنه وکړه چې د ارواښاد لايق له کورنۍ سره په همغږۍ به د نوموړي پاتې ناچاپ آثار چاپ کړي.
پوهاند رسول باوري وويل چې اکاډميسین سليمان لايق چې د تېرو شپږو- اوه لسيزو ولوليز شعر او ادب کومه کړکۍ پرانیستې وه، هغه د تل لپاره وتړل شوه. ډېر وخت په کار دی چې د لايق په څېر شخصيت پیدا او دغه تشه دې ډکه شي.
خو د ده په وينا، لايق ځوان نسل ته داسې آثار پریښي چې د وروستيو کابو پنځوسو کلونو د بدلونونو او تحولاتو تياره او غامض ټکي په کې ښکاره شوي دي. ځوان نسل دې د ده آثار مطالعه او ولولي، ځکه د ده آثار د يوه نسل لپاره نه، بلکې د پېړيو لپاره د لارښود حيثيت لري.
ديني عالم ډاکټر سيد حسين توکلي د نورو څرګندولو ترڅنګ، لايق وطندوست شخص وباله.
د ملي ډيموکراتيکو قوتونو پیغام کابل خان تدبير او د افغانستان د قلم ټولنې پیغام څېړنپوه محمد نبي صلاحي ولوست.
په پای کې د ارواښاد لايق د کورنۍ په استازيتوب بشير رویګر د حکومت له لوړپوړو چارواکو او د لايق د جنازې د درناوي او تدفين د مراسمو له کميسیون څخه مننه وکړه چې د ارواښاد لايق درناوی یې وکړ او د تدفين د مراسمو لپاره يې لازمې اسانتياوې برابرې کړې وې.
دغه مراسم د ماسپښين په یوه بجه د قاري محمد نعیم په دعائيه پای ته ورسېدل.
سليمان لايق د ۱۳۰۹ لمریز کال د تلې په ۲۱مه چې د ۱۹۳۰میلادي کال د اکتوبر له ۱۳مې نېټې سره سمون خوري د پکتیکا ولایت د ښرنې د ایمني خېلو په کلي کې دې نړۍ ته سترګې غړولې وې.
دی د ۱۳۹۸ لمریز کال د تلې د میاشتې په ۱۳مه د کابل ښار په شش درک سیمه کې په یوه برید کې سخت ټپي شو، چې لومړی په کابل کې تر درملنې لاندې ونیول شو، خو د روغتیایي حالت د خرابوالي له امله هندوستان ته ولېږدول شو او له هندوستانه د ښې درملنې لپاره جرمني ته ولېږدول شو او په پای کې د ۱۳۹۹لمریز کال د زمري د میاشتې په ۱۰مه د جرمني هېواد د ماینڅ په روغتون کې له ابدي ژوند سره یوځای شو. د هغه جسد تېره ورځ (د اسد ۲۰مه) له جرمني څخه کابل ته را انتقال شو.
