«د اسلامي نظام اقتصادي مسؤولیتونه» د مقالو ټولګه چاپ شوه
دغه ټولګه چې په (۸) مقالو مشتمله ده، په (۲۶۵) مخونو کې د افغانستان د علومو اکاډمۍ د اطلاعاتو او عامه اړيکو رياست له خوا په وزيري سایز کې د نوماند څېړندوی حافظ شاه محمد موسی زي په اهتمام او څېړنوال مفتي محمد نبي المیداني په ایډيټ چاپ شوه.
دغه ټولګه «د اسلامي نظام اقتصادي مسؤولیتونه» تر سرلیک لاندې د علمي- څېړنيز سيمينار د مقالو ټولګه ده چې ياد عنوان د اسلامي بانکدارۍ او معاصرو مسائلو څېړنیز مرکز علمي مجلس کې غوره شوی او سلسلةً د اسلامي علومو معاونیت او بالآخره د افغانستان د علومو اکاډمۍ د مشرتابه په ځانګړې پاملرنې د 1446 هـ. ق کال شعبان المعظم میاشت، په 27 چې د 1403 هـ. ش، حوت میاشت، 8 نېټې سره سمون لري، د علومو اکاډمۍ د علامه کهزاد په تالار کې د هېواد په کچه د يو ورځني سيمينار په توګه وړاندې شو چې پراخ رسنيز انعکاس يې درلود.
په یاده ټولګه کې دې موضوع ته کتنه شوې چې په اسلامي نظام کې حاکم او رعیت یو پر بل ځانګړي حقوق او مسؤولیتونه لري، هر لوری باید کوښښ وکړي چې دا حقوق او مسؤولیتونه سرته ورسوي، د اسلامي نظام له مهمو مسؤولیتونو څخه یو دا دی چې په خپل قلمرو کې د داسې معاملاتو په کلکه مخه ونیسي چې سود، غرر، قمار، یا نور فاسدوونکي عناصر په کې وي. اسلامي نظام باید د ناجائزو معاملاتو په منع کولو سره، هغو معاملاتو ته د تطبیق زمینه برابره کړي چې شریعت سره همغږي وي څو د هېواد اقتصاد له ځنډ یا خنډ سره مخ نه شي.
په همدې هدف (۸) عنوانه هغه مقالې چې په سيمينار کې د وړاندې کولو او چاپ لپاره د معيارونو د پوره كولو وروسته انتخاب شوي، دا دی ټولګه يې ستاسې حضور ته وړاندې کېږي.
په دې هيله چې د دغه ټولګې عالمانه پيغامونه او علمي- څېړنيزې مقالې د اسلامي نظام د لا استحکام، له نړۍ او خپلو خلکو سره يې د لا ښه تفاهم، يو د بل د ملاتړ او پرمختګونو سبب شي.
د دې علمي – څېړنيز اثر د منځپانګې لومړي مخونه په لاندې لينک کې لوستلی او تر لاسه کولی شئ...
يادونه: دا کتاب د علومو اکاډمي د اطلاعاتو او عامه اړيکو رياست اړوند کتاب پلورنځي څخه په مناسبه بيه تر لاسه کولای شئ.
د اړيکې شمېره: ۰۲۰۲۲۰۱۱۷۹
