د افغانستان د علومو اکاډمي او د سلام خصوصي پوهنتون ترمنځ د همکاريو هوکړه لیک لاسلیک شو
د افغانستان د علومو اکاډمي او د سلام خصوصي پوهنتون د علمي – څېړنیزو او تحصیلي همکاریو د زیاتوالي، په علمي - تحقیقي چارو کې د دوامداره اړیکو د پراختیا او د ګډو علمي موخو تر لاسه کولو په موخه هوکړه لیک لاسلیک کړ.
یاد هوکړه لیک د علومو اکاډمۍ د فرهنګي اړیکو رئيس ښاغلي مولوي محب الله عصمت او د سلام پوهنتون د عملي مرستیال استاد ښاغلي ابوبکر مدقق له خوا لاسلیک شو.
په یاده غونډه کې د علومو اکاډمۍ د بېلابېلو برخو رئیسانو، څېړونکو او نورو غړو ګډون کړی و او د یاد هوکړه لیک په ګټو او همکاریو یې خبرې وکړې.
ورپسې د سلام خصوصي پوهنتون عملي مرستیال ښاغلي مدقق لنډه وینا وکړه او د هوکړه لیک د دواړو خواوو د همکاریو او علمي ـ څېړنیزو کارونو د ترسره کولو په موخه یې خوښي څرګنده کړه.
