د جمهور رئيس له ستر سلاکار سره د علومو اکاډمي د سيمه ييزو مطالعاتو د مرکز رئيس کتنه
نن د افغانستان د علومو اکاډمۍ د سیمه ییزو مطالعاتو مرکز رئیس څېړندوی محمد سرور احمدزي او یو شمیر علمي غړو یې د افغانستان د اسلامي جمهوري دولت د جمهور رئیس له ستر حقوقي سلاکار محترم کبیر خان عیسی خیل سره وکتل .په دې کتنه کې چې د ولسمشرۍ په ماڼۍ کې ترسره شوه دواړو لورو د افغانستان د علومو اکاډمۍ د سیمه ییزو مطالعاتو مرکز او د جلالتماب جمهور رئیس د حقوقي سلاکار د دفتر ترمنځ د دوه اړخیزو اړیکو او همکاریو د رامنځته کولو د څرنګوالي په اړه تفصیلي خبرې اترې وکړې. د جمهور رییس ستر حقوقي سلاکار محترم عیسی خیل صاحب د افغانستان د علومو اکاډمۍ د سیمه ییزو مطالعاتو مرکز فعالیتونه،لاسته راوړنې او علمي څېړنې وستایلې او په هېواد کې د علمي - څېړنیزو ادارو،بنسټونو او مرکزونو ارزښت او اهمیت ته په اشارې سره ژمنه وکړه، چې په راتلونکي کې به د افغانستان د علومو اکاډمۍ د سیمه ییزو مطالعاتو مرکز له علمي فعالیتونو او چارو څخه ملاتړ وکړي. د یادونې وړ ده چې په دې کتنه کې دواړو لورو توافق وکړ چې په راتلونکي کې به د ګډو څېړنو په برخه کې له یوبل سره مرستې او همکاریو ته دوام ورکړي.