د سلګونو فولکلوريکو او ولسي سندرو ډالۍ
کابل، د ۱۳۹۹هـ. ش د سلواغې ۷مه
د افغانستان د علومو اکاډمي ته د ختیځ ادبي بهیر له خوا سلګونه فولکلوريکې او ولسي سندرې ډالۍ شوې.
د ختيځ ادبي بهير مشر ضیاءالدين همت مل د دغو سندرو فايلونه، نن (سه شنبه) د افغانستان د علومو اکاډمي عمومي رئيس څېړنپوه دکتور عبدالظاهر شکېب ته وسپارل.
ښاغلي شکېب د ختيځ ادبي بهير له مشر څخه مننه وکړه چې دغه ولسي زېرمه يې د علومو اکاډمي په واک کې ورکړه.
ده وويل، دغه فولکلوريکې سندرې د پښتو ژبې يوه بډايه برخه ده چې د علومو اکاډمي په فولکلوري ارشيف کې به خوندي شي او د فولکلوري څېړنو په برخه کې به څېړونکي له دې موادو استفاده کوي.
ښاغلي همت مل بیا ژمنه وکړه چې په راتلونکي کې به دغه ډول نور مواد هم د علومو اکاډمي په واک کې ورکړي.
