د علومو اکاډمي رئيس د جهادي مشر استاد عبدالرب رسول سياف سره وکتل
نن د ثور د میاشتې په دوهمه نېټه د افغانستان د علومو اکاډمي رئيس څېړنپوه دکتور عبدالظاهر شکېب، د علومو اکاډمي د بېلابېلو برخو مرستیالانو او علمي غړو د افغانستان جهادي او د دعوت اسلامي د ګوند مشر ښاغلي استاد عبدالرب رسول سیاف سره په پغمان کې مجلس درلود.
یاده ناسته چې نن له غرمې مخکې ترسره شوه، پکې د محترم استاد د روغتیا د پوښتنې ترڅنګ په یو لړ علمي او اکاډمیکو موضوعاتو بحثونه وشول.
ښاغلي استاد په ټوله کې د افغانستان د علومو اکاډمي اوسني هر اړخیز فعالیتونه وستایل او خوښي یې څرګنده کړه چې اوسمهال یې علمي او اکاډمیک کارونه او فعالیتونه د تقدیر وړ او په ښه شکل پر مخ ځي.
همدارنګه ترڅنګ یې د هر اړخیز ملاتړ ډاډ ورکړ چې په ټول توان ددغې علمي او فرهنګي ادارې سره هر ډول مرستې او همکارۍ ته تیار دی.
په پای کې د افغانستان د علومو اکاډمي د رئيس له لوري د علومو اکاډمي یو شمېر تازه چاپ شوي علمي- څېړنیز آثار ښاغلي استاد ته ډالۍ او ورکړل شول.
