په جرمني کې د پښتنو فرهنگي هڅې
د پښتو څېړنو بين المللي مرکز علمي غړي او د پښتنو تاریخ او فرهنګ انسټیټوټ آمر څېړندوی حمايت الله ښاد «په جرمني کې د پښتنو فرهنگي هڅې» تر سرليک لاندې علمي – څېړنيز کنفرانس وړاندې کړ.
په پيل کې د کنفرانس د موضوع پر موخو، ارزښت او اړتيا، د څېړنې پر ډول او مېتود باندې هر اړخيزې خبرې وکړې او ورپسې يې د موضوع په تړاو د المان يا جرمني د معرفۍ، له جرمني سره د افغانستان پر تاريخي، علمي او فرهنگي اړيکو، جرمني ته د افغانانو د ورتگ پر تاريخي بهير او لاملونو او په ټوله کې په جرمني کې د پښتنو له لوري پر ترسره شويو فرهنگي هڅو باندې رڼا واچول شوه.
څېړونکي د خپلې څېړنې له مخه هغه ټولنې او ترسره شوي فرهنگي فعاليتونه د وړاندې کولو تر څنگ وارزول چې د پښتنو له لوري په جرمني کې رامنځ ته شوي وو.
همدا راز په پايلې کې دا وښوول شول چې په جرمني کې پښتانه د خورا اوږدې مخينې او مېشتېدنې پر بنسټ د پښتو ادبياتو او فرهنگ يوه نوې فرهنگي حوزه رامنځ کړې ده چې د پښتو ژبې او فرهنگ د ودې او پراختيا په برخې کې يې ډېر خدمتونه ترسره کړي دي.
د علمي – څېړنيز کنفرانس په پای کې د برخوالو له لوري پوښتنې وړاندې شوې چې د څېړونکي له لوري ورته هراړخيز او مقنع ځوابونه ورکړل شول او د ارزوونکي کمېسيون له لوري دغه کنفرانس مثبت وارزول شو.
