د پشه یي ژبې د ادبیاتو تاریخ چاپ شو!
زموږ ګران هېواد له لرغونو او تاریخي ملتونو څخه دی چې ګڼ شمېر قومونه په کې د اسیا د لویې وچې په دې جفرافیوي خط او قلمرو کې مېشت دي، افغانستان د دې ټولو قومونو ګډ کور "افغان" یې د ټولو قومونو شریک نوم او همدې ټولو ولسونو په ګډه افغان ملت جوړ کړی دی.
زموږ د هېواد په لرغونو قومونو کې یو هم پشه یان دي چې په ختیځو ولایتونو (ننګرهار، لغمان، کونړ او نورستان) او همدارنګه کاپیسا، بغلان او د کابل پغمان پشه یي دره کې اوسېږي.
د پشه يي ژبې ادبیاتو په اړه د ارواښاد استاد پوهنمل نور محمد غمجن دا اثر چې څلور لسیزې دمخه یې د کابل پوهنتون د ژبو او ادبیاتو پوهنځي کې د پوهندوی علمي پوړ ته د لوړاوي لپاره لیکلی او دفاع کړی، دا کلونه کلونه چاپ او خپراوي ته سترګی په لار و.
دغه اثر د علومو اکاډمي د اطلاعاتو او عامه اړیکو د ریاست له خوا په (۲۶۹) مخونو کې په ښکلي صحافت د اکاډمیسین دوکتور سید محي الدین هاشمي په کتنه، سمون او زیار چاپ او خپور شوی دی. منځپانګه یې په پنځو څپرکو کې راټوله او دغه موضوعات: د پشه یانو پېژندګلوي، د پشه یانو جفرافیوي موقعیت، د پشه یانو په عمومي ژوند تحلیلي څېړنه، د پشه یي ژبې د منظومو او منثور ادبیاتو مفصله پېژندګلوي او په وروستي څپرکي کې د پشه یي ژبې د ادبیاتو د تاریخي دورو او ځینو شاعرانو لنډه پېژندګلوي راغلې ده.
د دغه اثر د منځپانګې لومړي مخونه په لاندې لينک کې لوستلی او تر لاسه کولی شئ:
يادونه: دغه کتاب د علومو اکاډمۍ د اطلاعاتو او عامه اړيکو له رياست څخه په مناسبه بيه تر لاسه کولای شئ.
د اړيکې شمېره: ۰۲۰۲۲۰۱۱۷۹
