د نورستان په فوکلوري سندرو کې د ځينو عناصرو د انعکاس څېړنه «علمي- څېړنيز کنفرانس»
د ژبو او ادبیاتو مرکز علمي غړې څېړنوالې عاطفې نورستانۍ د «د نورستان په فوکلوري سندرو کې د ځينو عناصرو د انعکاس څېړنه» په نوم علمي- څېړنيز کنفرانس وړاندې کړ.
دغه کنفرانس چې د یکشنبې په ورځ د ۱۳۹۹لمريز کال د سنبلې په ۳۱مه ترسره شو، په کې لسګونو د علومو اکاډمي پوهانو او څېړونکو ګډون کړی وو.
اغلې نورستانۍ د يادې موضوع په اړه وويل:
په ټوله کې نورستاني ولسي سندرې د دې سيمې د خلکو کليوالي ژوند، ذوقونه، ستیتکي ارزښتونه، غوښتنې او ارمانونه په خورا روښانه ډول په طبيعي عناصرو کې تمثيلوي. دا سندرې د معلوماتو او اطلاعاتو ورکولو ډېره ښه وسيله ګڼله کېږي.
څرنګه چې دوی خپرونې نه درلودې، دا په زړه پورې ساده او عاميانه سندرې د هغو خلکو رښتيني او لرغونې تاريخي څېره څېړونکو ته څرګندوي چې په کلاسيکو قالبونو کې د ډېرو ډولونو په لرلو سره د شکل او محتوا له مخې د نورو ولسي سندرو په څېر طبيعي او زړه راښکونکې دي. البته دا ټول ياد شوي مميزات د نورستاني ولسي سندرو د لرغونتوب نښې دي.