((په سعودي عربستان کې د مېشتو پښتنو ادبي ـ فرهنګي هڅې)) اثر چاپ شو
په سعودي عربستان کې د مېشتو پښتنو ادبي - فرهنګي هڅې د پښتو څېړنو د بین المللي مرکز د علمي غړې آغلې څېړندوی نازو کمال اثر دی چې د علومو اکاډمي د اطلاعاتو او عامه اړیکو ریاست له لوري په ۱۶۰ مخونو کې چاب شوی دی، یاد اثر څلور څپرکي لري چې د څېړنې له اصولو سره سم لومړی څپرکی د موضوع شالید دی، په دې څپرکي کې هغه آثار معرفي شوي دي چې د موضوع په اړه بحثونه په کې شوي دي. په دویم څپرکي کې لومړی عمومي عنوان (په سعودي عربستان کې د پښتنو د مېشتېدو څرنګوالی، تاریخي بهیر او لاملونو څېړل) چې بیا ورپسې په دې عنوانونو کې لومړی د سعودي عربستان لنډه پېژندنه شوې، ورپسې د پښتنو او عربو فرهنګي اړیکې څېړل شوي، بیا په سعودي عربستان کې د پښتنو د مېشتېدو تاریخي بهیر روښانه شوی او د مېشتېدو لاملونه یې ښودل شوي دي. په درېیم څپرکي کې په یاد هېواد کې د مېشتو پښتنو د فرهنګي او ادبي هڅو تاریخي بهیر څېړل شوی دی چې هلته موجودې ادبي ټولنې او ادبي بهیرونه په منظم ډول په کې تشریح او معرفي شوي، همدارنګه د ځینو نورو لیکوالانو او شاعرانو پر پېژندنې سربېره د دوی د کلام بېلګې هم راوړل شوي دي. په څلورم یا وروستي څپرکي کې د پورته ادبي ټولنو او بهیرونو له خوا د رامنځ ته شوو او چاپ شویو آثارو تحلیلي څېړنه شوې ده چې لومړی یې منظوم او بیا منثور آثار تحلیل شوي دي. په پای کې د پښتو ادب او فرهنګ په وده کې د دغو ټولنو په ونډه خبرې شوي او ارزونه یې شوې ده. په وروستیو کې پایله، وړاندیزونه او د مأخذونو فهرست راوړل شوی دی.
د دې علمي – څېړنيز اثر د منځپانګې لومړي مخونه په لاندې لينک کې لوستلی او تر لاسه کولی شئ...
يادونه: دا کتاب د علومو اکاډمي له اطلاعاتو او عامه اړيکو رياست څخه په مناسبه بيه تر لاسه کولای شئ.
د اړيکې شمېره: ۰۲۰۲۲۰۱۱۷۹
