«د ښځو پر وړاندې د تاوتریخوالي د مخنیوي» غونډه جوړه شوه
کابل، د علومو اکاډمي: د افغانستان د علومو اکاډمي د جندر آمریت له خوا «د ښځو پر وړاندې د تاوتریخوالي د مخنیوي» په نوم غونډه د ۱۳۹۹ هـ. ش کال د لیندۍ میاشتې په ۱۶مه نېټه د یکشنبې پر ورځ ترسره شوه.
غونډه د قرآن کریم په تلاوت او د ملي سرود په غږولو سره پیل شوه.
د افغانستان د علومو اکاډمي د بشري علومو مرستیال څېړنپوه دکتور محمد علم اسحاقزي په خپلې پرانیستې وينا کې وویل: د دې ورځې په نمانځلو سره مونږ د ښځو له حقوقو ملاتړ کوو او ټول نارینه مکلف دي چې د اسلام د مقدس دین په رڼا کې ځان د ښځو له حقونو خبر کړي.
ده زياته کړه، ځیني خلک وایي په هغو هېوادونو کې د ښځو پر وړاندې تاوتریخوالي زیات دی، چې یا فقیر وي یا هم مسلمانان په کې وي، حال دا چې ښځو ته په اسلام کې د نورو اديانو په نسبت ډېر زیات حقونه ورکړل شوي دي.
نوموړي پر ښځو غږ وکړ چې سره یو شي، د خپلو حقونو غوښتنه وکړي او له خپلو ورورنو هېوادوالو سره یوځای د هېواد په آبادۍ کې ونډه واخلي.
ورپسې د ښځو چارو وزارت پیغام د ګل رخ بدخشي له خوا ولوستل شو چې په کې راغلي وو:
تاوتریخوالی نړیواله معضله ده چې یواځې په افغانستان پورې اړه نه لري، خو په افغانستان کې بدبختانه د څلورو لسیزو جنګونو را په دېخوا ښځې د دولت په ملي پرمختیا کې له ګډون څخه لرې پاتې شوې دي.
د ښځو حقوق د افغانستان په اساسي قانون او د افغانستان په نورو قوانینو کې درج شوي او د هغه د پلي کولو میکانیزمونه هم جوړ شوي دي او تاوتریخوالی د جرم په توګه په قانون کې ذکر شوی دی، د تاوتریخوالي د کچې د کمولو په خاطر د مرکز او ولایتونو په کچه کمیسونونه، څارنوالۍ، محکمې او د ملي پولیسو مدیریتونه جوړ شوي دي.
څېړنوالې فرزانې حبیبي د «نقش رسانه ها در کاهش و افزایش خشونت ها علیه زنان» په نوم خپله مقاله وړاندې کړه.
څېړندویې مارینا بهار د تاوتریخوالي د رامنځته کېدو پر عواملو مفصل خبرې وکړې او څېړنوال عبدالرحمن عادل او څېړندوی محمد حامد مصلح ناستو کسانو ته له ښځو سره د تاوتريخوالي د مخنيوي په باب خبرې وکړې.
