د افغانستان د علومو اکاډمۍ کتاب پلورنځی نن له غرمې مخکې د دغې ادارې د مسؤلینو له خوا پرانستل شو.
کابل – د افغانستان د علومو اکاډمي د تلې ۳۰مه
د علومو اکاډمۍ د طبیعي – تخنیکي علومو مرستیال شیخ الحدیث مولوي امیرجان ثاقب د دغه کتاب پلورنځي د پرانیستلو په مراسمو کې لومړی د علومو اکاډمۍ پر علمي کارونو او فعالیتونو هر اړخیزې خبرې وکړې او بیا یې د کتاب پر اهمیت او مبرمیت خپل نظر شریک کړ او د یاد کتابپلورنځي په اړه یې وويل چې دغه کتاب پلورنځی په بېلابېلو علمي، ادبي، تاريخي، ديني او نورو برخو کې په ګڼ شمېر کتابونو سره سمبال شوى دى او څېړنېزې مجلې او جریدې هم په کې شته.
د نوموړي په وینا له دغه کتاب پلورنځي څخه ټول هيوادوال په تېره بيا محصلان په ځانګړي تخفیف سره کتابونه ترلاسه کولای شي.
تر شیخ ثاقب وروسته ځینو نورو مسئولینو هم د کتاب او کتابپلورنځي پر اهمیت او مبرمیت خبرې وکړې او په ټولنه کې یې د څېړنیزو او اکاډمیکو کتابونو رول جوت کړ.
د یادونې وړ ده چې په دغه کتاب پلورنځي کې د یوې اونۍ لپاره هيوادوالو ته په دېرش سلنه تخفيف سره او محصلانوته په پنځوس سلنه تخفيف سره کتابونه وړاندې کيږي.
