لوړ فعاليت لرونکې مايع کروماتوګرافي (HPLC) او د افغانستان په تحليلي لابراتوارونو کې يې اړتيا او اهميت څېړل
«علمي – څېړنیز کنفرانس»
د افغانستان علومو اکاډمي د طبیعی – تخنیکي علوم معاونیت اړوند د کيميا، بيولوژي او کرنې علومو مرکز علمي غړي ښاغلي څېړندوی عمران لايق د ( لوړ فعاليت لرونکې مايع کروماتوګرافي (HPLC) او د افغانستان په تحليلي لابراتوارونو کې يې اړتيا او اهميت څېړل ) تر سلیک لاندې علمي – څېړنیز کنفرانس د طبیعي – تخنیکي علومو په معاونیت کې د څېړونکو، استادانو او د خوړو او درملو معينيت متخصصينو په حضور کې وړاندې کړ.
د کنفرانس په پيل کې ښاغلي لايق وويل؛ په داسې حال کې چې د HPLC تخنيک په پرمختللو هېوادونو کې د کیفیت کنټرول، څېړنو، درمل جوړونې، غذايي صنعت او چاپېريالي څېړنو بنسټیز عنصر ګڼل کېږي، اما په افغانستان کې د دې تخنيک اهميت او اړتيا لا هم له پاملرنې پاتې ده. د افغانستان تحليلي لابراتوارونه د HPLC او نورو پرمختلليو تخنيکي تجهيزاتو، مسلکي کادرونو او د معیارونو د پلي کولو له کمښت سره مخ دي، چې له امله يې نه يوازې سمې څېړنې نه شي تر سره کېدای، بلکې د درملو، غذايي موادو او چاپېريال د کيفيت ارزونه هم له جدي ستونزو سره مخ دي. د همدې لپاره، اړينه ده چې په افغانستان کې د HPLC اړوند علمي-څېړنيز کنفراسونه او روزنيز کورسونه دائر شي، ترڅو له دې لارې د تحلیلي لابراتوارونو علمي ظرفیت لوړ شي، د کیفیت کنټرول معیاري شي او د عامې روغتیا، تغذیې، زراعت او چاپېريال په برخه کې د باور وړ تحلیلونو ترسره کولو ته زمينه برابره شي.
په یاد کنفرانس کې لومړی د HPLC پېژندنې، ډولونو، اجزاو، کروماتوګرام، د کارونې ساحې او مراقبت باندې رڼا واچول شوه. په دویم قدم کې د افغانستان په تحليلي لابراتوادونو کې د HPLC اوسنی وضعیت، اهميت او اړتيا باندې بحث وشو.
د کنفرانس په لړ کې ښاغلي لايق پر هغو ستونزو او خنډونو هم بحث وکړ چې په اوس وخت کې د HPLC د پلي کولو او پراخېدو په وړاندې خنډ دي او د افغانستان تحليلي لابراتوارونه ورسره مخ دي. د دې ترڅنګ څېړونکي هغه حل لاري په ګوته کړې چې په عملي کولو سره یې د عامې روغتیا، توليدي او توريدي غذايي موادو او درملو کيفيت ښه کېدای شي او په يادو برخو کې د کيفيت ارزونه هم په دوامداره توګه په ښه ډول ترسره کېدای شي.
د کنفرانس په وروستۍ برخه کې د علومو اکاډمي علمي غړو ، استادانو او متخصصينو د موضوع اړوند خپل نظریات او پوښتنې مطرح کړل چې د ښاغلي څېړندوی عمران لايق لخوا ورته د قناعت وړ ځوابونه وړاندې شول. په پای کې دغه علمي-څېړنيز کنفرانس د ارزونې د کميسيون له لوري د رايو په اتفاق سره مثبت و ارزول شو او څېړونکي ته يې د لا نورو علمي برياوو او خدمتونو هيله وکړه.
