د علومو اکاډمي او د ترکیې هېواد نجم الدین اربکان پوهنتون ترمنځ آنلاین غونډه
د افغانستان د علومو اکاډمي او د ترکیې هېواد د نجم الدین اربکان پوهنتون ترمنځ آنلاین غونډه وشوه. د غونډې په پیل کې د نجم الدین اربکان پوهنتون د بهرنیو اړیکو مسؤول ښاغلي پروفیسور فطرت یلداز د خپل پوهنتون تاریخچه او علمي ظرفیت بیان کړ، ورپسې د علومو اکاډمي د طبیعي او تخنیکي علومو معین شیخ الحدیث مولوي امیرجان ثاقب دعلومو اکاډمي لنډه تاریخچه بیان کړه او د ورور هېواد (ترکيې) له علمي مرکز، نجم الدین اربکان پوهنتون، سره یې د علمي دوه اړخیزو همکاریو ژمنه هم وکړه او زیاته یې کړه چې د افغانستان اسلامي امارت له ټولو نړیوالو هيوادونو، په ځانګړې توګه له دوست او ورور هېواد ترکیې سره په اسلامي او افغاني ارزښتونو ولاړو متقابلو او دوستانه اړیکو ته ژمن دی.
د نجم الدین اربکان پوهنتون د بهرنیو اړیکو مسؤول ښاغلي پروفیسور فطرت یلداز له مننې کولو وروسته وویل چې په نېږدې راتلونکي کې د یاد پوهنتون پلاوی کابل ته درځي چې د دې سفر پر مهال به د افغانستان د علومو اکاډمۍ له رهبري او علمي کادرونو سره هم له نېږدې وګوري او د علمي ګډو همکاریو هوکړه لیک به ورسره لاسلیک کړي
