په افغانستان کې پر لرغونو آریک ژبو د شویو کارونو څېړنه
"د علمي-څېړنېزي پروژې دفاع"
د افغانستان د علومو اکاډمي، د بشري علومو معاونيت اړوند د ژبو او ادبیاتو مرکز د لرغونو ژبو انسټیټیوټ علمي غړي نوماند څېړندوی محمد اتل انګار د نوماندۍ دورې د رفع کولو لپاره له خپلې یوې کلنې علمي - څېړنیزې پروژې "په افغانستان کې پر لرغونو آریک ژبو د شویو کارونو څېړنه" څخه د علومو اکاډمي د څېړونکو، استادانو، پوهانو او د دفاع د ارزونې کمیسیون په وړاندې خپله دفاع تر سره کړه.
دا علمي- څېړنيزه رساله د لارښود استاد پر نظر سربېره؛ په سريزه، څلورو څپرکو، پايلې، وړاندیزونو، او مأخذونو مشتمله ده چې تفصیل یې په لاندې ډول دی:
په لومړي څپرکي کې د اړوندې موضوع شاليد روښانه شوی دی.
په دويم څپرکي کې د «آریک ژبو کورنۍ» تر سرلیک لاندې د هندو اروپایي ژبنۍ کورنۍ، آریک ژبښاخ، اندو آریایي ژبڅانګې او د آریاني ژبڅانګې په اړه یې د افغانستان په حوزه کې چې کومې څېړنې شوې دي؛ مفصل جاج اخیستل شوی دی.
په درېيم څپرکي کې د اندو آریایي ژبڅانګې په دوو «ویدي او سنسکرېت ژبو» د شویو کارونو څېړنه شوې ده.
په څلورم څپرکي کې د آریاني ژبڅانګې د لرغوني پړاو پر «اوستا، زړه پارسي، زړه ساکي او مېدي ژبو» او د آریاني ژبڅانګې د منځني پړاو پر «باختري، سغدي، خوارزمي، منځنۍ ساکي (ختني)، اشکاني پهلوي (منځنۍ پارتي یا پارفیاني) او ساساني پهلوي (منځنۍ پارسي) ژبو» د شویو کارونو څېړنه شوې ده.
څېړونکي په پای کې د دې علمي-څېړنيزې پروژې پايله، وړانديزونه، او په رساله کې کارول شوي مأخذونه راوړي دي.
د دې علمي- څېړنيزې پروژې د دفاع په پای کې د څېړونکي له خوا د څېړونکو، ګډونوالو او د کمیسیون د غړیو پوښتنو ته قناعت کوونکي ځوابونه وويل شول.
د غونډې په پای کې د یادې علمي- څېړنيزې پروژې د دفاع د ارزونې کميسيون له لوري د رايو په اتفاق سره دا علمي _څېړنیزه پروژه مثبته وارزول شوه او څېړونکی له نوماند څېړندوی علمي رتبې څخه د څېړندوی علمي رتبې ته د ترفیع وړ وبلل شو.
