د پښتو ژبې د ليکدود د يووالي په اړه غونډه
کابل: د پښتو ژبې د ليکدود د يووالي په اړه غونډه د ۱۳۹۹هـ. ش کال د وږي مياشتې په ۱۶مه او ۱۷مه نېټه د افغانستان په علومو اکاډمي کې ترسره شوه.
په دې علمي غونډه کې د علومو اکاډمي د ژبو او ادبیاتو مرکز د پښتو ژبې او ادبیاتو انستیتوت علمي غړو، د پښتو څېړنو بین المللي مرکز علمي غړو، د کابل د ښوونې او روزنې پوهنتون او کابل پوهنتون استادانو او ځینو نورو څانګوالو برخه اخیستې وه.
په دې دوه ورځنۍ غونډه کې چې د تېرو څو غونډو په دوام ترسره شوه، په کې د پښتو ژبې د ليکدود د يووالي په اړه بحثونه وشول او په پايله کې په دې اړه اړينې پرېکړې وشوې.
په پام کې ده چې دغه پرېکړې به په نږدې راتلونکي کې له ټولو هېوادوالو او رسنيو سره شريکې شي.
بايد يادونه وکړو چې ځينې پوهان په انلاين ډول په غونډه کې موجود وو.
