«د پښتو لهجوي قاموس» لپاره ساحوي څېړنه

د افغانستان د علومو اکاډمي د ژبو او ادبیاتو مرکز د پښتو ژبې او ادبیاتو انستیتوت علمي غړو «د پښتو لهجوي قاموس» لومړی پړاو تېر ۱۳۹۹ لمریز کال په بریالیتوب سره د اتو ټوکونو په چاپولو پای ته ورساوه او دا دی له ښه مرغه دویم پړاو یې سږ ۱۴۰۰ لمریز کال د هېواد له شرقي زون (ننګرهار، کونړ او لغمان) ولایتونو څخه را پیل کړ.

د علومو اکاډمي علمي غړي د ننګرهار، کونړ او لغمان ولایتونو بېلا بېلو لرې او نږدې ولسوالیو، سیمو او کلیو ته سفرونه وکړل او د خپلو پښتني قبیلو، قومونو او خېلونو نورې لهجې يې ثبت کړې چې په روان کال کې به چاپ او خپور شي.

ننګرهار ولايت ته د لهجو راټولو لپاره څېړنوال سيد نظيم سيدي، څېړندوی رحيم الله حريفال، څېړنيار شريف الله دوست او څېړنيار محمد اسحاق مومند؛ لغمان ولايت ته څېړندوی مطيع الله ساحل او څېړندوی احسان الحق کبیر؛ او کونړ ولايت ته څېړندوی حضرت اغا همدرد او څېړنيار فضل رحمن عليزي تللي وو او خپلې چارې يې په برياليتوب ترسره کړې.