د پکتیکا ولایت مرکز ښرنې ښار ځينو سيمو د څښاک اوبو د کیفیت تحلیل او ارزونه
«علمي – څېړنیز کنفرانس»
د افغانستان علومو اکاډمي د طبیعی – تخنیکي علومو معاونیت اړوند د کيميا، بيولوژي او کرنې علومو مرکز علمي غړي، ښاغلي څېړندوی عمران لايق د ( د پکتیکا ولایت مرکز ښرنې ښار ځينو سيمو د څښاک اوبو د کیفیت تحلیل او ارزونه) تر سلیک لاندې علمي – څېړنیز کنفرانس د کيميا، بيولوژي او کرنې علومو مرکز کې د څېړونکو او استادانو په حضور کې وړاندې کړ.
د کنفرانس موخې د پکتیکا ولایت مرکز ښرنې ښار د ټاکل شويو څاه ګانو د اوبو فزیکي، کیمیاوي او مایکروبیولوژيکي پارامترونو تحلیل، د WHO ، ASQA او EPA معیارونو سره يې پرتله، د مجاز حد څخه د پورته یا ټيټ پارامترونو پېژندنه او د حل لارو وړاندیز وې.
په دې څېړنه کې د ښرنې ښار هغه شپږ څاه ګاني د نمونې اخیستلو لپاره ټاکل شوې وې چې ګڼ نفوس یې د څښاک لپاره کاروي او له یو بل څخه په کافي اندازه فاصله لري. په دې څېړنه کې نمونه اخيستنه (Sampling) د EPA نمونې اخیستنې لارښود سره سم ترسره شوې او د نمونو 19 ډوله فزيکي، کيمياوي او مایکروبیولوژيکي پارامترونه د علومو اکاډمي په لابراتوار کې تحلیل او ازمایښت شوي دي.
په څېړنه کې د نمونو د تحلیل لپاره APHA, ASTM او ISO ازمایښت میتودونه ټاکل شوي و او د مجاز حدونو لپاره WHO, ASQA او EPA ټاکل شوي و. د نمونو د ازمایښت لپاره د UV-Vis Spectrophotometer په ګډون د تحلیل پرمختللي او عیار شوي تجهیزات کارول شوي و.
د څېړنې موندنو برخه کې د ټاکل شويو څاه ګانو نمونو تحلیل شوي پارامترونه له مجاز حدونو سره پرتله شوي او د مناقشې په برخه کې ټول تحلیل شوي پارمترونه اروزل شوي او له مجاز څخه د لوړو یا ټيټو پارامترونو د اصلاح لپاره حللارې وړاندې شوې دي.
د ټاکل شويو څاه ګانو د اوبو د کیفیت په اړه د څېړنې د موندنو په اساس مشخصې پايلې او وړانديزونه وړاندې کړل شوي دي.
د کنفرانس په وروستۍ برخه کې د علومو اکاډمي علمي غړو ، استادانو او متخصصينو د موضوع اړوند خپل نظریات او سوالونه مطرح کړل چې د ښاغلي څېړندوی عمران لايق لخوا ورته د قناعت وړ ځوابونه وړاندې شول. په پای کې دغه علمي-څېړنيز کنفرانس د ارزونې د کميسيون له لوري د رايو په اتفاق سره مثبت و ارزول شو او څېړونکي ته يې د لا نورو علمي برياوو او خدمتونو هيله وکړه.
