د کاردیوجنیک شاک د پېښو، لاملونو، تشخیص او درملنې څېړنه
![څېړنوال دوکتور ضیاءالرحمن حقمل](/sites/default/files/2024-05/%DA%85%DB%90%DA%93%D9%86%D9%88%D8%A7%D9%84%20%D8%AF%D9%88%DA%A9%D8%AA%D9%88%D8%B1%20%D8%B6%DB%8C%D8%A7%D8%A1%D8%A7%D9%84%D8%B1%D8%AD%D9%85%D9%86%20%D8%AD%D9%82%D9%85%D9%84.jpg)
“د علمي- څېړنيزې پروژې دفاع”
څېړونکی: څېړنوال دوکتور ضیاءالرحمن حقمل
د څېړنې ځای: د جمهوریت ملي تخصصي روغتون او امیري طبي کمپلکس.
د دفاع ځای: د افغانستان د علومو اکاډمي د طبیعي علومو معاونیت
د دفاع دغه غونډه د قرآن عظیم الشان د مبارکو آیاتونو په تلاوت سره پیل شوه. وروسته د څېړونکي ژوند لیک، د لارښود استاد نظر او څلور تقریظونه ولوستل شول. ورپسې څېړونکي ته وخت ورکړل شو چې له علمي – څېړنیزې پروژې څخه دفاع وکړي. څېړونکي په ټاکلې موده کې په بریالیتوب سره دفاع وکړه، د حاضرینو پوښتنو ته یې قانع کوونکي ځوابونه ورکړل او په پای کې د نوموړي دفاع، د ټاکل شوي کمېسیون د ټولو غړو د رایو په اتفاق سره تأیید شوه. دغه علمي څېړنیزه رساله په 476 مخونو کې لیکل شوې ده. دا یوه توصیفي مشاهدوي (Observational descriptive) څېړنه ده چې د SPSS پروګرام په مرسته یې ارقام تحلیل شوي دي. په ټولیزه توګه په دغه څېړنه کې د کاردیوجنیک شاک 591 ناروغان څېړل شوي چې ارقام یې په ریتروسپیکټیو او پروسپیکټیو بڼه راټول شوي و. په لومړي څپرکي کې د موضوع شالید، په دویم څپرکي کې د موضوع په اړه عمومیات، په درېیم څپرکي کې د کاردیوجنیک شاک د اپیدیمیولوژي، لاملونو او مساعد کوونکو فکتورونو څېړنه، په څلورم څپرکي کې د کاردیوجنیک شاک د کلینیکي نخښو نښانو او تشخیصیه پلټنو څېړنه، په پنځم څپرکي کې د کاردیوجنیک شاک د درملنې او په روغتون کې د اختلاطاتو او انذراو څېړنه، په شپږم څپرکي کې د موضوع علمي روغتیايي ارزښت بیان شوي او په پای کې د څېړنې پایلې، له لیتراتور سره مناقشه، وړاندیزونه، مأخذونه او ضمیمه ځای په ځای شوي دي.