د افغانستان د علومو اکاډمي او د تاتارستان د علومو اکاډمي ترمنځ هوکړه ليک لاسليک شو

دوشنبه، ۹ وری ۱۴۰۰

کابل: د افغانستان د علومو اکاډمي د رهبري پلاوي، د تاتارستان جمهوريت د صدراعظم مرستيال او د دغه هېواد د علومو اکاډمي د رهبرۍ پلاوي او په روسيه کې د افغانستان د لوی سفير سيد طيب جواد په حضور کې د افغانستان د علومو اکاډمي او د تاتارستان د علومو اکاډمي ترمنځ د علمي او څېړنيزو همکاريو هوکړه ليک نن (دوشنبه) د وري په نهمه په آنلاین بڼه لاسليک شو.

په دې ويډيويي کنفرانس کې د افغانستان د علومو اکاډمي عمومي رئيس څېړنپوه دکتور عبدالظاهر شکېب، علمي منشي څېړنوال دکتور رفيع الله نيازي، د بشري علومو مرستيال څېړنپوه دکتور محمد علم اسحاقزي، د طبيعي- تخنيکي علومو مرستيال څېړنپوه رحمت ګل احمدي او څو تنو نورو مسئولينو د افغانستان له خوا ګډون کړی و.

دغه راز د تاتارستان جمهوريت د صدراعظم مرستيال شیخ راضییف واصیل هاپتیل ایازوویچ، د تاتارستان د علومو اکاډمي رئيس ساخالوف، په کازان کې د روسيې د بهرنيو چارو وزارت استازي وخيد توف، د تاتارستان د مسلمانانو د بنسټ رئیس خبیب بولین او د همدې هېواد د علومو اکاډمي څو تنو غړو برخه اخیستې وه.

په پیل کې د تاتارستان جمهوريت مرستيال صدراعظم د دواړو هېوادونو ترمنځ د هوکړه ليک د لاسليک کېدو په مناسبت د آنلاين کنفرانس په ترسره کېدلو خوښي وښوده او ويې ويل: د دواړو هېوادونو ترمنځ د مناسباتو تاریخچه اوږده ده، دې نېکو اړيکو ته په پام سره د دواړو هېوادونو د اکاډميو ترمنځ د هوکړه لیک طرحه رامنځ ته شوه چې نن يې د لاسليک کېدو شاهدان يو.

د تاتارستان د علومو اکاډمي رئيس وويل چې د دواړو هېوادونو د علومو اکاډميو ترمنځ د هوکړه ليک لاسلیک کېدل د علم او څېړنې په برخو کې دواړو خواوو ته ګټوره او ارزښتمنه چاره ده.

په روسيه کې د افغانستان سفير سيد طیب جواد په علمي او فرهنګي برخه کې د دواړو لورو ترمنځ د علمي- څېړنيزو بنسټونو اړيکه وستايله او ويې ويل چې د دې هوکړه ليک په لاسليک کېدو سره به د تاتارستان له جمهوريت سره د همکاريو نوی پړاو پيل شي.

نوموړي، افغانستان ته د تاتارستان د علومو اکاډمي د رهبري پلاوي د سفر په اړه ژمنه وکړه چې په دې برخه کې هر ډول همکارۍ ته چمتووالی لري.

د افغانستان د علومو اکاډمي عمومي رئیس څېړنپوه دکتور عبدالظاهر شکیب د تاتارستان جمهوريت سره د اړیکو په رامنځ ته کولو خوښي وښوده او ويې ویل، دغه هوکړه لیک باید څو مياشتې مخکې لاسلیک شوی وای، خو د کرونا ویروس د خپرېدو له امله وځنډېد؛ خوشحاله يو چی نن دغه هوکړه لیک په آنلاین بڼه لاسلیک کېږي.

هغه زیاته کړه، د کرونا ویروس په ختمېدو سره به د دواړو اکاډميو ترمنځ تګ راتګ زيات او اړيکې لا پراخې شي.

نوموړي هيله وښوده چې د ياد شوي هوکړه ليک د پلي کېدو په اړه عملي ګامونه واخيستل شي.

شکیب له ټولو هغو اشخاصو او بنسټونو مننه وکړه چې د دغه هوکړه لیک د چمتو کولو په اړه یې زیار ایستی دی.

د کنفرانس په پای کې د دواړو هېوادونو د علومو اکاډميو د رئیسانو له خوا د علمي- څېړنيزو همکاریو هوکړه لیک لاسلیک شو.