د هایدرونفروز د اپیدمیولوژي، لاملونو، اختلاطاتو او درملنې څېړنه
څېړونکی: څېړنوال ډاکټر میرویس (حقمل).
د ترسره کولو ځای: په هېواد کې د ننه.
د دفاع نېټه: د چهارشنبې ورځ، په ۱۴۰۱/۱۱/۱۹ نېټه
د دفاع ځای: د افغانستان د علومو اکاډمي
دغه دفاعي غونډه د قرآن عظیم الشان د څومبارکو آیاتونو په تلاوت سره پیل شوه. وروسته د څېړونکي ژوند لیک، د لارښود استاد نظر او څلور تقریظونه ولوستل شول. ورپسی څېړونکي ته وخت ورکړل شو چې له علمي- څېړنیزې پروې څخه دفاع وکړي. څېړونکي په ټاکلې موده کې په بریالي توب سره دفاع وکړه، د حاضرینو پوښتونو ته یې قانع کونکي ځوابونه ورکړل چې په پای کې د نوموړی دفاع د ټاکل شوي کمیسیون د ټولو غړو د رایو په اتفاق سره تأیید شوه. دا علمي څېړنیزه رساله په (۳۹۲) مخونو کې لیکل شوې چې (۱۵۹) څېړنیزو جدولونه او (۱۲۲) ګرافونه لري. دا یوه Descriptive څېړنه ده چې د SPSS پروګرام په مرسته یې څېړنیز ارقام تحلیل شوي دي. په دې څېړنه کې څېړنیز ارقام په Prospective او Retrospective شکلونو راټول شوي وو. دا علمي – څېړنیزه رساله په پنځو څپرکو کې په روانه پښتو ملي ژبه لیکل شوې، داسې چې په لومړي څپرکي کې د موضوع شالید، په دویم څپرکي کې د موضوع په اړه عمومیات، په درېیم څپرکي کې د هایدرونفروز د اپیدمیولوژي او لاملونو څېړنه او په څلورم څپرکي کې د هایدرونفروز د اختلاطاتو او درملنې څېړنه ځای پرځای شوې ده. په پنځم څپرکي کې د موضوع علمي او روغتیایي ارزښت بیان شوی او په پای کې د څېړنې پايلې، له لیتراتور سره مناقشه، وړاندیزونه، مأخذونه او درېیو ضمیمو ته ځای ورکړل شوی دی.
