په افغانستان کې د اسلامي اقتصادي نظام د تطبیق فرصتونه او ننګونې

د افغانستان د علومو اکاډمي د إسلامي علومو معاونیت د إسلامي بانکدارۍ او معاصرو مسائلو مرکز د معاصرو مسائلو انسټيټیوټ د مالي او پولي ډيپارټمنټ علمي غړي نوماند څېړندوی شاه محمد "موسی زي" د څېړندوی علمي رتبې ته د لوړاوي په موخه له خپلې علمي – څېړنیزې پروژې "په افغانستان کې د اسلامي اقتصادي نظام د تطبیق فرصتونه او ننګونې" څخه د إسلامي بانکدارۍ او معاصرو مسائلو مرکز کې د علماوو، پوهانو او څېړونکو په حضور کې دفاع وکړه.
غونډه د قرآن کریم د څو مبارکو آیاتونو په تلاوت سره پیل شوه، ورپسې د څېړونکي ژوندلیک، د لارښود استاد نظر ولوستل شول، وروسته څېړونکي خپله علمي – څېړنیزه موضوع په ټاکلي وخت کې وړاندې کړه، د حاضرینو پوښتنو ته یې قانع کوونکي ځوابونه وویل او په پای کې د ټاکل شوي کمیسیون له لورې وړاندې شوې دفاع مهمه، مثبته او د رایو په اتفاق سره تائید او ومنل شوه.
دغه علمي – څېړنیزه رساله چې په څلورو څپرکیو کې بشپړه شوې، په لومړي څپرکې چې د موضوع شالید په اړه دی، په کې د اسلامي اقتصادي نظام د تاریخ مختلف پړاوونه د رسول الله صلی الله علیه وسلم له دورې څخه رانیولي تر عثماني خلافت پورې، څېړل شوي. په دوهم څپرکې کې اقتصادي نظامونه او د هغوی نیمګرتیاوې،  اسلامي اقتصادي نظام او ځانګړتیاوې یې او د افغانستان اقتصادي وضعیت تشریح شوی، په درېیم څپرکې کې په اوسنيو شرایطو کې په افغانستان کې د اسلامي اقتصادي نظام د تطبیق پر وړاندې شته فرصتونه بحث او څېړل شوي. په څلورم څپرکې کې په افغانستان کې د اسلامي اقتصادي نظام د تطبیق پر وړاندې ننګونو په اړه بحث او څېړنه شوې او د حل لارې وړاندې شوي دي. دا څېړنه د پایلې، وړاندیزونو او مأخذونو په راوړلو سره پای ته رسېدلې ده.