٬٬پښتو نیولوګيزم او ژبپوهنه٬٬ اثر چاپ شو!

٬٬ پښتو نیولوګیزم او ژبپوهنه٬٬ د ژبو او ادبیاتو د مرکز د علمي غړي څېړنوال رحیم الله حریفال علمي ــ څېړنیز اثر دی چې د اطلاعاتو او عامه اړیکو ریاست له لوري په ۱۷۶ پاڼو کې په ښکلې بڼه په ۱۴۰۱ ل کال کې چاپ شو.

 نیولوګیزم: د نویو جوړو شویو لغتونو لپاره چې کومه نومونه کارول کېږي، هغه نیولوګیزم بلل کېږي. د نیولوګیزم اصطلاح اصلاً په یوناني ژبې پورې اړه لري او د دوو لغتونو له ترکیب څخه منځ ته راغلې ده. لومړۍ برخه یې د neos)) لغت دی چې د (نوي) معنا لري، دویمه برخه یې د (logos) لغت دی چې د ویي یا لغت معنا لري.

په دې اثر کې د پښتو نیولوګیزم  په اړه په پنځو څپرکو کې تر بېلابېلو سرلیکونو لاندې بحثونه شوي دي:

په لومړي څپرکي کې د موضوع په شالید خبرې شوې دي او په دې رڼا اچول شوې چې په پښتو ژبه کې  د نیولوګیزم په اړه څومره کار شوی دی.

 دویم څپرکی په ژبه کې د نیولوګیزم په اړه د ژبپوهنې دریځ ته ځانګړی شوی دی.

په درېیم څپرکي کې د نیولوګیزم تاریخي بهیر ته لنډه کتنه شوې ده. د پښتو نیولوګیزم په برخه کې په انفرادي هڅو، د علمي مرکزونو او فرهنګي ټولنو په هڅو رڼا اچول شوې ده او همدارنګه په نظامي برخه کې د نیولوګیزم بهیر څېړل شوی دی.

په څلورم څپرکي کې د ژبې پر لغوي زېرمه باندې د نیولوګیزم د اغېزو په اړه خبرې شوې دي او همدارنګه پر دې موضوع هم بحث شوی چې د پردیو کلمو ژباړه او بدلون نیولوګیزم ګڼل کېږي او که نه؟

پنځم څپرکی په ارخاییزم باندې د نیولوګیزم اغېزو ته ځانګړی شوی دی.

اثر په علمي پایلې، وړاندیزونو او د مأخذونو د فهرست په راوړلو سره پای ته رسېږي.

د منځپانګې لومړي مخونه یې په لاندې لینک کې لوستلی او ترلاسه کولای شئ:

https://asa.gov.af/sites/default/files/2023-01/Pashto%20Neologism%20And%20Linguistics.pdf

یادونه: دا کتاب د علومو اکاډمي د اطلاعاتو او عامه اړیکو له ریاست څخه  په مناسبه بیه ترلاسه کولای شئ.

د اړیکې شمېره: ۰۲۰۲۲۰۱۱۷۹