د کابل ښار د نباتي پوښښ د بیا رغونې په اړه څېړنه
«علمي – څېړنیز کنفرانس»
د افغانستان د علومو اکادمي د طبیعی – تخنیکي علوم معاونیت د ځمکپوهنې مرکز علمي غړي ښاغلي څېړنوال عبدالرحمن لطیف ( د کابل ښار د نباتي پوښښ د بیا رغونې په اړه څېړنه ) تر سلیک لاندې علمي – څېړنیز کنفرانس د طبیعي – تخنیکي علومو په معاونیت کې د څېړونکو، استادانو او علماء کرامو په حضور کې وړاندې کړ.
په یاد کنفرانس کې لومړی د کابل ښار د پخواني او اوسنۍ نباتي پوښښ په اړه مقایسوي ارقام او جغرافیایي نقشې وړاندې شوې، په دویم قدم کې د دغه ښار د نباتي پوښښ د کموالي او لږوالي په عواملو او همدارنګه د هغو په ناوړو اغېزو باندې ړنا واچول شوه.
د کنفرانس په لړ کې ښاغلي لطیف پر هغو نویو طرحو او لارو چارو بحث وکړ، کوم چې په عملي کولو سره یې نه یوازې د کابل ښار نباتي پوښښ وده کوي، بلکې په دغه ښار کې د هوا ککړتیا له منځه ځي او تر څنګ یې شین او سمسور طبیعي چاپېریال رامنځته کېږي.
د کنفرانس په وروستۍ برخه کې د علومو اکاډمي علمي غړو ، استادانو او محققینو د موضوع اړوند خپل نظریات او سوالونه مطرح کړل چې د ښاغلي ځېړنوال عبدالرحمن لطیف لخوا ورته د قناعت وړ ځوابونه وړاندې شول. په پای کې دغه علمي-څېړنيز کنفرانس د ارزونې د کميسيون له لوري د رايو په اتفاق سره مثبت و ارزول شو او څېړونکي ته يې د لا نورو برياوو هيله وکړه.
