د قرآن کریم او سنتو په رڼا کې د ښې حکومتولۍ لارې چارې

نن د چهارشنبې ورځ د ۱۴۴۷هـ ق کال د ربیع الاول په ۳مه نېټه چې د ۱۴۰۴ ل کال د وږي میاشتې له ۵مې نېټې سره سمون خوري د علامه احمد علي کهزاد د غونډو په تالار کې د علومو اکاډمي د اسلامي علومو معاونیت د تفسیر او حدیث مرکز په نوښت (د قرآن کریم او سنتو په رڼا کې د ښې حکومتولۍ لارې چارې) تر سرلیک لاندې علمي ـ څېړنيز سیمینار د اسلامي امارت مسؤلینو، څېړونکو، علماء کرامو او د پوهنتون د استاذانو په حضور کې وړاندې شو.
سیمینار د قرآن کریم د څو مبارکو آیتونو په تلاوت سره پیل شو، ورپسې د علومو اکاډمۍ عمومي رئیس ښاغلي شیخ الحدیث مولوي فریدالدین محمود درنو میلمنو ته د ښه راغلاست ترڅنګ د سیمینار ګډونوالو ته عالمانه او پرانېستې وینا وکړه، ښاغلي شیخ صاحب وویل:
لکه څرنګه چې د یاد سیمینار عنوان او هدف د قرآن کریم او سنتو په رڼا کې د ښې حکومتولۍ لارې چارې دي نو د اسلامي نظام حکومتولي هم باید د قرآن کریم او سنتو د لارښوونو په اساس مخته لاړه شي، کار باید د کار اهل او وړ شخص ته وسپارل شي، د نظام چارې په لاس کې اخستل او مخته وړل خورا سخت او دروند مسؤلیت دی، د اخرت په ورځ آن له هغه چا هم پوښتنه کېږي چې د لسو کسانو په سر امیر او مشر ټاکل شوی وي، نو د امت د نجات او خلاصون لاره په شریعت باندې عمل کول او د رسول الله صلی الله علیه وسلم او د هغه د صحابه کرامو رضي الله عنهم پیروي کول دي، چې د (ما أنا علیه وأصحابي) حدیث مفهوم دی. مونږ هېڅکله باید غدر، دوکه او خیانت ونه کړو، هېڅکله باید د الله تعالی یو حکم او یو امر د خلکو د خوشحالولو لپاره تر پښو لاندې نه کړو.
وروسته د ریاست الوزراء د دفتر مرستیال ښاغلي عبد الستار سعید صاحب د رئیس الوزراء الحاج ملا محمد حسن اخند په استازیتوب پیغام ولوست، په پیغام کې د یاد سیمینار له جوړولو مننه وشوه او دا د قدر وړ اقدام وبلل شو او په یاد پیغام کې وویل شول چې، ښه حکومتولي د شریعت او اسلامي ملت غوښتنه ده او د اسلامي نظام واکمنان د الله تعالی د حکمونو په پلي کولو کې مسؤلیت لري، په قرآن کریم او سنتو کې مونږ ته د عدالت، امر بالمعروف او نهي عن المنکر، مشورې کولو، شفافیت، د امارت رعایت او د مسلمان ولس خدمت کولو لارښوونې شوې دي، د هېواد د درنو علماء کرامو، پوهانو او قلموالو دنده دا ده چې د خپلو علمي څېړنو او تحقیقاتو په ترڅ کې د ښې حکومتولۍ د اصولو په اړه پراخې څېړنې وکړي او نتایج یې له اسلامي نظام سره شریک کړي ترڅو اړونده ادارې د یادو څېړنو او سپارښتنو په رڼا کې خپلې چارې سنبالې کړي.
ورپسې د امر بالمعروف، نهي عن المنکر او شکایتونو اورېدلو وزارت معین محترم شیخ القران والحدیث مولوي نور محمد صاحب، د بهرنیو چارو وزارت معین ښاغلي ډاکټر محمد نعیم وردګ صاحب، د ارشاد حج او اوقافو وزارت معین محترم مولوي عزیز الرحمن منصور صاحب او د استخباراتو لوی ریاست په استازیتوب ښاغلي خدای نظر حماد صاحب د ښې حکومتولۍ اړوندې ویناوې وکړې.
په یاد سیمینار کې د مقالو لوستلو لړۍ هم جریان درلود چې له ګڼ شمېر مقالو څخه یې (۵) عنوانه مقالې ولوستل شوې او د سیمینار په پای کې څېړونکو او ګډونوالو په (۷) مادو کې د سیمینار پرېکړه لیک تصویب کړ او د څېړنپوه نور الحق عزیزي لخوا د ټولو ګډونوالو په حضور کې ولوستل شو.
سیمینار د ښاغلي څېړنپوه سید حبیب شاکر په ارزونه او د علومو اکاډمي د دعوت او ارشاد رئیس مفتي محمد اکبر مقسط په دعائیې سره پای ته ورسېد.