له علومو اکاډمۍ نه د ننګرهار پوهنتون استادانو او محصلینو لیدنه (علمي سیر)

نن دوه‌نۍ (دوشنبه) د ۱۴۰۵ ل کال د تلې (میزان) میاشت ۲۷مه د ننګرهار پوهنتون د ژبو او ادبیاتو پوهنځي د پښتو ژبې او ادبیاتو څانګې استادانو، هر یو؛ محترم پوهندوی میرویس خالقیار، محترم پوهنیار حفیظ الله باغبان او محترم پوهندوی محمد عثمان څولیزي د یادې څانګې له یو شمېر هڅاندو محصلینو سره یوځای د افغانستان د علومو اکاډمي له مرکزي کتابتون او اتنوګرافیک څېړنیز موزیم څخه لیدنه وکړه.

د دې علمي سفر په لومړۍ برخه کې، یاد علمي پلاوي د علومو اکاډمۍ له بډایه او تخصصي کتابتون څخه لیدنه وکړه، چې هلته ورته د ژبو او ادبیاتو په برخه کې د نادرو اثارو، خطي نسخو او معاصرو څېړنیزو مجلو په اړه هر اړخیز معلومات ورکړل شول او محصلینو ته لارښوونه وشوه چې څنګه کولای شي د خپلو مونوګرافونو او راتلونکو علمي مقالو لپاره له دغو مأخذونو څخه ګټه پورته کړي.

 په دویم پړاو کې استاذانو او محصلینو د اتنوګرافیک څېړنیز موزیم بېلابېلې برخې وکتلې، چې د افغانستان د اصیل کلتور، ژبني تنوع، تاریخي اثارو او له ادبیاتو سره د مادي کلتور پر تړاو پکې له لرغونو آثارو څخه لیدنه وکړه.

د دې کلتوري او علمي سفر په لړ کې د علومو اکاډمۍ د مسوولینو له خوا راغلو استاذانو ته یو شمېر ارزښتمن کتابونه او علمي اثار هم ډالۍ شول.

دا لیدنه د محصلینو د فکري او څېړنیزې کچې د لوړولو لپاره خورا ګټوره وه او په پای کې د ننګرهار پوهنتون استادانو د علومو اکاډمۍ د مسوولینو له تود هرکلي او علمي ډالیو څخه ځانګړې مننه وکړه او د دواړو علمي بنسټونو ترمنځ یې پر دوامداره کلتوري او علمي همکاریو ټینګار وکړ.

د افغانستان د علومو اکاډمي واټس اپ چینل له لاندې لینک څخه تعقیبولئ شئ....

https://whatsapp.com/channel/0029VbCQAO7DTkK4eJX7DB1L