په ختيځ زون کې د پشهيي ژبې سواد زدهکړې لپاره د چاپ شوو آثارو د ستونزو څېړنه
"علمي-څېړنيز کنفرانس"
د افغانستان د علومو اکاډمي د بشـري علومو معاونيت د ژبو او ادبياتو مرکز د وروڼو قومونو د ژبو او ادبياتو انسټيټوټ علمي غړي ښاغلی څېړندوی فريدالله فرحان نن دوشنبه د ۱۴۰۲ل کال د کب میاشتې په ۷مه نېټه (په ختيځ زون کې د پشهيي ژبې سواد زدهکړې لپاره د چاپ شوو آثارو د ستونزو څېړنه) تر سرليک لاندې علمي-څېړنيز کنفرانس وړاندې کړ. نوموړي د کنفرانس په پیل کې د څېړنې پر موخه، اهميت او مبرميت خبرې وکړې او ورپسې یې د ټولو هغو ستونزو چې په ختیځ کې د پشه يي ژبې سواد زده کړې لپاره (د سرف افغانستان مؤسسې) له خوا په چاپ شوو آثارو کې موجودې وې، لازم او علمي بحث وکړ، لکه: د پشه يي ژبې د ګرافیمونو ستونزې، د پور وييونو د کارونې ستونزې، په ناسمه بڼه د پور وييونو د لیکلو التباس له پشهيي وییونو سره، د ملي ترمينالوژۍ او ځينو خاصو نومونو د ناسمو لیکلو ستونزې او د (لهـ او ڵ) ګرافيمونو ځانګړتياوې او نيمګړتياوې یې د کنفرانس په بحث کې څرګندې او روښانه کړې. په پايله کې یې د حللارې په توګه د پور وييونو په خپله اصلي بڼه د لیکلو سپارښتنه وکړه چې پر بنسټ به یې له یوې خوا د کلمې اصلي ریښه او معنا ساتل شوې وي او له بلې خوا به د پشهيي ژبې له خپلو کلمو سره په معنا کې التباس نه پيدا کوي او د دې ترڅنګ یې د ملي ترمينالوژۍ او ځينو خاصو نومونو د سمې او منل شوې بڼې لیکل هم ضروري او لازمي وبلل.
