د ملاکنډ سيمې فرهنګي بهير څېړنه
د افغانستان د علومو اکاډمي، د بشري علومو معاونیت، د پښتو څېړنو نړيوال مرکز علمي غړي ښاغلي نوماند څېړندوی شهد رحيمي «د ملاکنډ سيمې فرهنګي بهير څېړنه» تر سرليک لاندې علمي ـ څېړنيزه پروژه د څېړونکو او استاذانو په حضور کې دفاع کړه.
په دې علمي ـ څېړنيزه پروژه کې د موضوع پر موخو، ارزښت او اړتيا د څېړنې پر ډول او مېتود باندې خبرې شوي، او ورپسې د موضوع په تړاو د شوو څېړنو بحث شوی دی.
په دويم فصل کې د ملاکنډ سيمې په جغرافيوي موقعيت ـ تاريخي حالت او د پښتنو په مېشته قبيلو باندې بحث شوی او دا پکې معلومه شوې چې د پښتنو دغه قبيلې د ملاکنډ سيمې په کومو برخو کې ژوند کوي.
د څېړنې په درېيم فصل کې د څېړنيز پلان او پروپوزل مطابق د ملاکنډ سيمې په فرهنګي او ادبي وضعيت باندې څېړنه شوې ده، په فرهنګي برخه کې د ملاکنډ سيمې ښوونيزه برخه، تاريخي ابدات، دودونه او د ګرځندوی سیمې څېړل شوي دي او په ادبي وضعیت کې د ملاکنډ سيمې فرهنګي او ادبي ټولنې، موقوتې او غيرې موقوتې خپرونې او همدرانګه د سيمې د فرهنګي او ادبي شخصيتونو لنډه پېژندنه راغلې ده. دغه څېړنه په يوې جامع پايلې، وړانديزونو او مأخذونو سره پای ته رسېدلې ده.
ملاکنډ سیمه د فرهنګي ميراثونو کور دی، دغه سیمه په پښتونخوا کې د خپل جغرافيوي او تاریخي اهميت له پلوه د پښتني دودونو یوه ځانګړې سیمه ده، د ملاکنډ سيمې په فرهنګي او ادبي وضعيت باندې تر اوسه يوه ځانګړې اکاډميکه څېړنه نه وه شوې، خو اوس په دې آثر کې شته معلومات دغه تشه ډکولی او د ملاکنډ د سيمې علمي ـ فرهنګي او کلتوري حالت څېړونکو ته جوتولی او هغه په علمي ـ فرهنګي لحاظ د پښتونخوا د يوې مهذبې او پرمختللې سيمې په توګه د همدې معلوماتو په رڼا کې ورپېژندلی شي.
د علمي ـ څېړنيزې پروژې د دفاع په پای کې د څېړونکو او استاذانو پوښتنو ته قانع کوونکي ځوابونه ورکړل شول او د ارزوونکي کميسيون له لوري يې دفاع مثبته و ارزول شوه.
