د کابل اوبه ييزې حوزې د هایدروګرافیکي ځانګړتياوو څېړنه "علمي- تحقيقي پروژه"

د کابل اوبه ييزې حوزې د هایدروګرافیکي ځانګړتياوو څېړنه
"علمي- تحقيقي پروژه"
-----------------------------------------------------------
کابل: د علومو اکاډمي د ځمکې علومو د مرکز علمي غړي عبدالرحمن لطيف تر پورته سرليک لاندې علمي- څېړنيزې پروژې څخه د ١٣٩٨هـ. ش کال د کب په ١١مه په برياليتوب دفاع وکړه.
ده وويل:
د کابل اوبیزه حوزه د هېواد په ختیځه سیمه کې موقعیت لري، د دغې اوبیزې حوزې ټول پراخوالی کابو ۷۵۳۹۰ کیلومتره مربع ته رسېږي، چې د ۱۲ ولایتونو ځمکې په کې راځي.
دغه څېړنه چې د کابل اوبیزې حوزې د هایدروګرافیکي ځانګړتیاوو په اړه تر سره شوې ده، په پایله کې يې دا ثابته شوه چې په دغې اوبیزې حوزه کې ډېرې اقتصادي وړتیاوې شته.
د بېلګې په توګه، دغه سیمه د اوبیزې برېښنا د تولید لپاره ډېره مناسبه ګڼل کېږي چې کېدای شي د لویو بندونو په جوړولو او د روانو اوبو په زېرمه کولو سره په کې په ډېره لوړه کچه آبي برېښنا تولید شي او تر څنګ یې ډېرې بېدیاوې او بایرې ځمکې وکرل شي.
په طبیعي بڼه د کابل اوبیزه حوزه یوه سیلابي او د خاورو د ایروژن لپاره مساعده سیمه ده، چې هر کال سیلابونه په کې بهیږي او تر څنګ یې ډېره مفیده او حاصلخیزه خاوره له یادې حوزې څخه بهر ته وځي، نو په پای کې د روانو اوبو، د برېښنا تولید، د خاورو د ایروژن او د سیلابونو له زیانونو څخه د مخنیوي لپاره ډېرې اغېزمنې طرحې او وړاندیزونه د ښاغلي لطیف له خوا وړاندې شول، چې د محققینو او څېړونکی د پام وړ وګرځېدل.