د افغانستان د علومو اکاډمي او د بایزید روښان خصوصي لوړو زده کړو مؤسسې ترمنځ د همکارئ هوکړه لیک لاسلیک شو
د افغانستان د علومو اکاډمي او د بایزید روښان خصوصي لوړو زده کړو مؤسسې د علمي – څېړنیزو او تحصیلي همکاریو د زیاتوالي، د دوامداره کاري اړیکو د پراختیا او ګډو علمي موخو تر لاسه کولو په موخه هوکړه لیک لاسلیک کړ.
یاد هوکړه لیک د علومو اکاډمي د فرهنګي اړیکو رئيس ښاغلي مولوي محب الله عصمت او د بایزید روښان خصوصي لوړو زده کړو مؤسسې رئیس عبد الحکیم حکمت له خوا لاسلیک شو.
په یاده غونډه کې د علومو اکاډمي د بېلا بېلو برخو رئیسانو، څېړونکو او نورو غړو ګډون کړی و چې د یاد هوکړه لیک په ګټو او همکاریو یې خبرې وکړې.
ورپسې د بایزید روښان خصوصي لوړو زده کړو مؤسسې رئیس د یادې مؤسسې په اړه لنډ معلومات وړاندې کړل او د هوکړه لیک د دواړو خواوو د همکاریو او علمي ـ څېړنیزو کارونو د ترسره کولو په موخه یې خوښي څرګنده کړه.
غونډه د علومو اکاډمي د اطلاعاتو او عامه اړیکو رئیس مولوي محمد عمر جلال په دعاء پای ته ورسېده.
