د تسلیت او خواخوږۍ پيغام
په ډېرې خواشينۍ سره خبر شو چې د هېواد نوموتی ليکوال، څېړونکی، مؤرخ او علمي شخصيت کاندید اکاډميسين پوهاند مير حسین شاه د ورپېښې ناروغۍ له امله د ۹۵ کلونو په عمر له هېواده بهر د پرديسۍ په ديار کې په حق رسېدلی دی.
«انا لله و انا الیه راجعون»
پوهاند مير حسین شاه چې کلونه کلونه يې په کابل پوهنتون کې د هېواد د بچيانو د روزلو سپېڅلې دنده تر سره کړې وه او د دې تر څنګ يې د بېلابېلو علمي بنسټونو غړیتوب هم درلود، لکه: د افغانستان د علومو اکاډمۍ ممتاز غړی، د افغانستان د ملي ارشیف غړی، د افغانستان د تاریخ انجمن غړی، د کابل پوهنتون د عالي شورا غړی، د افغانستان د لرغون پېژندنې مسلکي غړی، د افغانستان د لوړو زده کړو د وزارت مشاور، د افغانستان د اطلاعاتو او کلتور وزارت مشاور او په نوي ډهلي کې د هند د ملي ارشیف غړی.
نوموړي دغه راز ارزښتمن علمي څېړنيز آثار هم ليکلي وو، چې په دې سره يې د هېواد د فرهنګ او تاريخ په غنامندۍ کې خپل رول په سمه توګه تر سره کړی و.
د افغانستان د علومو اکاډمي مشرتابه د ارواښاد مړينه د علم او فرهنګ په ډګر کې لويه ضایعه بولي، د تسليت او همدردۍ مراتب يې کورنۍ او د علم او فرهنګ ټولو مينه والو ته وړاندې کوي، له الله تعالی څخه پوهاند صيب ته د جنت الفردوس او کورنۍ ته يې جميل صبر او اجر غواړي.
الحکم لله
