د پښتو ادبي فنونو کره کتنه او ارزونه» علمي- تحقيقي رسالې څخه د دفاع غونډه
کابل: د افغانستان د علومو اکاډمي د پښتو څېړنو بین المللي مرکز علمي غړي څېړنوال دوکتور عبدالظاهر شکیب په ۲/ ۶/ ۱۳۹۹ نېټه له خپلې علمي- څېړنیزې رسالې «د پښتو ادبي فنونو کره کتنه او ارزونه» څخه د څېړنپوه علمي رتبې ته د ترفیع په موخه په بریالیتوب دفاع وکړه.
ښاغلي شکېب دغه پروژه د څېړنپوه دوکتور سيد محی الدین هاشمي په لارښوونه بشپړه کړې او د نوموړي مثبت نظر يې ترلاسه کړی او همدارنګه څلورو استادانو هر يو پوهاند پښتون اقا شېرزاد، څېړنپوه علي محمد منګل، څېړنپوه نعمت الله اندړ او څېړنپوه عبدالشکور قيومي پرې مثبت تقریظونه لیکلي وو.
یاده پروژه پر سریزې سربېره په پنځو څپرکو کې څېړل شوې او لیکل شوې ده چې په پای کې د څېړنې پایله او وړاندیزونه هم راوړل شوي دي.
په ټوله کې په ياده پروژه کې د ادبی فنونو په درېيو څانګو (بديع، بيان او قافيه) هر اړخيزه څېړنه او کره کتنه شوې ده.
