د سعدالدین شپون په کیسه ییز ادب کې حدیث نفس
«علمي - څېړنیزه مقاله»
لیکوال :څېړنوال سید نظیم سیدي
لنډیز
په دې څېړنه کې لومړی د داستاني ادب یو جوړښتی عنصر چې هغه حدیث نفس یا له ځان سره خبرې کول دي معرفي شوی، دا چې حدیث نفس څه شی دی؟ ادبڅېړونکي يې په اړه وايي: د نفس حدیث یا له ځان سره خبرې د داستاني ادب هغه جوړښتي برخه ده چې په هغې کې د کیسې کرکټر له ځان سره په داسې بڼه خبرې کوي چې مخاطب يې معلوم نه وي. دغه ډول خبرې ډېر ځله د کرکټر فکري او داخلي مسایل بیانوي. د حدیث نفس له مخې موږ ته د کرکټر د فکر او ذهني بټۍ جوړښت معلومېږي چې څومره نرم، ملایم، عاطفي او احساساتي انسان دی، ښېګڼې يې څومره دي او مضریت يې څومره.
تر دې بحث وروسته د استاد شپون پر کیسه ییز ادب لنډه تبصره شوې او بیا په کې د حدیث نفس بېلګې وړاندې شوې دي. دا څرګنده خبره ده چې د وخت او حالاتو له غوښتنې سره سم په ادب کې هم بدلون راځي، خو استاد شپون یو داسې کیسه لیکوال دی چې تر ډېره يې په کیسو کې د داستاني ادب نوې ځانګړنې تطبیقېږي چې دا کمال د ډېرو لږو کیسه لیکوالو په داستانونو کې شته، نو ځکه يې هر وخت څېړل او سپړل له ګټې او نوو خبرو څخه خالي نه دي.