د علومو اکاډمي د سیمه ییزو مطالعاتو مرکز د څېړنې مېتودولوژي پنځه میاشتني کورس یوویشت ۲۱ تنه فارغانو فراغت غونډه
د علومو اکاډمي د سیمه ییزو مطالعاتو مرکز د څېړنې مېتودولوژي پنځه میاشتني کورس یوویشت ۲۱ تنه فارغانو ته د فراغت غونډه جوړه کړه. په دې غونډه کې د علومو اکاډمي د بشري علومو محترم مرستيال څېړنپوه دکتور محمد علم اسحق زي او د طبیعي او تخنیکي علومو محترم مرستيال شیخ مولوي امیر جان ثاقب او نورو مشرانو برخه اخيستې وه، ويناوالو په اوسني عصر کې د څېړنې پر اهمیت او اړتیا خبرې وکړې او ټینګار یې وکړ چې د سیمه ییزو مطالعاتو مرکز په چوکاټ کې دې دغه ډول پروګرامونه نور هم دوام ومومي او په ورته مهال یې په څېړنیز کورس کې د تدریس په هکله د ښاغلي سرمحقق زلمي هېوادمل د زیار او هڅو ستاینه هم وکړه.
د سیمه ییزو مطالعاتو مرکز په استازیتوب څېړندوی عمران زکریا وینا وکړه او د څېړنې مېتودلوژي کورس یې د علمي بنسټونو او نورو دولتي او خصوصي ادارو لپاره جدي اړتیا وبلله. ښاغلي زکریا د قدرمن استاد سرمحقق زلمي هېوادمل د هڅو د ستایلو ترڅنګ پر دې ټینګار وکړ چې د علومو اکاډمي مشرتابه دې د سیمه ییزو مطالعاتو مرکز په چوکاټ کې د دغه ډول علمي – څېړنیزو او روزنیزو پروګرامونو د دایرولو له لارې د هېواد په کچه څېړونکو او لیکوالانو ته د لا نورو زده کړو فرصتونه برابر کړي.
غونډه په کورس کې برخه والو ته د بري ليکونو په توزیع سره پای ته ورسېده.
