(د ادبي څېړنې میتودولوژي) کتاب چاپ شو
د افغانستان د علومو اکاډمي د پښتو ژبې او ادبیاتو انستیتوت د علمي غړي او د کابل مجلې د مسئول مدیر څېړنپوه محمد نبي صلاحي اثر (د ادبي څېړنې میتودولوژي) د اطلاعاتو او عامه اړیکو ریاست له خوا په ښکلې قطع او صحافت سره په ۲۹۲ مخونو کې چاپ شو.
د دې کتاب په سر کې د لارښود استاد سرمحقق دکتور سیدمحی الدین هاشمي ګزارش چاپ شوی دی. له هغه وروسته د سرمحقق زلمي هېوادمل، څېړنپوه نصرالله ناصر، څېړنپوه مولاجان تڼیوال او څېړنپوه عبدالشکور قیومي تقریظونه یو په بل پسې چاپ شوي دي.
کتاب یوه سریزه او شپږ څپرکي لري او له ۱۱۵ پښتو، دري، اردو او انګلیسي سرچینو نه استفاده په کې شوې ده.
په لومړي څپرکي کې د موضوع په شالید باندې خبرې شوې دي. په دویم څپرکي کې د څېړنې عمومي مفهوم تشرېح شوی دی. دا څپرکی ۶ برخې لري. درېیم څپرکی د ادبي څېړنې میتودولوژي ته ځانګړی شوی او ۷ برخې لري. څلورم څپرکی د ادبي څېړنې عملي لارې چارې ښیي او ۸ برخې لري. په پنځم څپرکي کې د ادبي څېړنې پړاوونه، په ۱۰ برخو کې ښودل شوي او په شپږم څپرکي کې د څېړنیز اثر د بشپړتابه تخنیکي اړخونه په ۵ برخو کې بیان شوي دي. له هغه وروسته د څېړنې پایله، وړاندیزونه او مأخذونه راوړل شوي دي.
دا څېړنه د پخوانیو څېړنو په پرتله ګڼ توپیرونه او ارزښتونه لري. لومړی توپیر یې دا دی چې په ځانګړې توګه د ادبي څېړنې میتودولوژي په اړه لومړنی، خپلواک او مستقل اثر دی او د میتودیک تحقیق نږدې بشپړ میکانیزم په کې تشرېح شوی دی. دویم توپیر یې دا دی چې د دغې موضوع په اړه داسې ټکي په کې ځای پر ځای کړی شوي دي چې هغه نوي، تازه او اپډیټ معلومات دي چې په دې وروستیو وختونو کې د څېړونکو تر منځ د علمي بحثونو پایله ده. درېیم ټکی دا دی چې په علمي څېړنو کې ډېر ښه اثر هغه دی چې څېړونکي په کې د موضوع د سپړنې حق په ښه توګه ادا کړی وي، د تکنیکي اړخونو له پلوه یې معیارونه پوره کړي وي او محقق په خپله څېړنه کې د لوستونکي قناعت حاصل کړای شي. دا اثر دغه ځانګړنه هم لري.
د دې علمي – څېړنيز اثر د منځپانګې لومړي مخونه په لاندې لينک کې لوستلی او تر لاسه کولی شئ...
يادونه: دا کتاب د علومو اکاډمي له اطلاعاتو او عامه اړيکو رياست څخه په مناسبه بيه تر لاسه کولای شئ.
د اړيکې شمېره: ۰۲۰۲۲۰۱۲۷۹
