په ښوونیز نظام کې د ارزونې اغېزې او ننګونې
«د علمي څېړنیز کنفرانس»
د افغانستان د علومو اکاډمي، بشري علومو معاونیت اړوند د ارواپوهنې او تربیتي علومو انسټیټوټ علمي غړي ښاغلي څېړندوی ثناءالله صالحي خپل علمي – څېړنیز کنفرانس « په ښوونیز نظام کې د ارزونې اغېزې او ننګونې» تر سرلیک لاندې د علومو اکاډمي د څېړونکو، استادانو، پوهانو او د ارزونې کمیسون او ګډونوالو ته وړاندې کړ.
یاده څېړنه د ښوونیز نظام په چوکاټ کې د ښوونیزې ارزونې د اغېزو او موجودو ننګونو علمي او تحلیلي څېړنه کوي. څېړنه د توصیفي ـ تحلیلي میتود پر بنسټ او د کمي څېړنې له طریقې ترسره شوې ده. د معلوماتو د راټولولو لپاره معیاري پوښتنلیک کارول شوی چې د ننګرهار ولایت د دوو لیسو ښوونکو او د ښوونکو د مسلکي پراختیا استادانو، ټولټال ۶۸ تنو، په کې ګډون کړی و. راټول شوي معلومات د SPSS 26 احصائیوي سافټویر له لارې تحلیل شوي دي.
د څېړنې پایلې ښيي چې ښوونکي ارزونه د ښوونیز نظام لپاره یوه مهمه تعلیمي او اداري وسیله بولي، ځکه چې د تدریس د تنظیم، د زدهکوونکو د پرمختګ د سنجش او د تعلیمي پرېکړو د سمون په برخه کې رغنده رول لري. د احصائیوي موندنو له مخې، د ارزونې اغېزې په منځنۍ تر لوړې کچې پورې ارزول شوې دي، چې دا د ښوونیز نظام پر کیفیت د ارزونې مثبت اغېز څرګندوي.
سره له دې، څېړنه دا هم څرګندوي چې د ارزونې د اغېزمن تطبیق پر وړاندې یو لړ جدي ننګونې شته، لکه د ښوونکو د مسلکي روزنې کمښت، د معیاري ارزونې وسایلو نشتوالی، د ټولګیو زیات ازدحام، د حافظهمحور ارزونې دود، او کمزوری اداري ملاتړ. څېړنې ښودلې چې که څه هم ارزونه اغېزمنه ده، خو د دغو ننګونو شتون یې عملي اغېز محدودوي.
د کنفرانس ګډونوالو د یادې څېړنې علمي ارزښت وستایه او ټینګار یې وکړ چې د دې ډول تجربوي او احصائیوي څېړنو پایلې کولای شي د ښوونیزو پالیسیو د اصلاح، د ښوونکو د مسلکي ودې او د ارزونې د سیستم د پیاوړتیا لپاره مهم بنسټونه برابر کړي.
د څېړنې په پای کې، څېړونکي وړاندیز وکړ چې د ښوونیزې ارزونې د اغېزمنتیا لپاره باید د ښوونکو مسلکي روزنه پیاوړې شي، د بدیلو او معیاري ارزونې میتودونو کارول دود شي او د ارزونې پایلې د تعلیمي اصلاحاتو لپاره په منظم ډول تحلیل او وکارول شي.
څېړونکي د یاد کنفرانس په ارائه غونډه کې د ګډونوالو او پوهانو پوښتنو ته قانع کوونکي ځوابونه ورکړل او د ټاکل شوي کمیسون ټولو غړو د رایو په اتفاق سره یاد علمي – څېړنیز کنفرانس مثبت و ارزاوه او غونډه په دعا سره پای ته ورسیده.
