د بيرغ ملي ورځ ونمانځل شوه
![د بيرغ ملي ورځ ونمانځل شوه](/sites/default/files/2021-07/d_byrgh_mly_wrh_wnmanhl_shwh.jpg)
۷ اسد ۱۴۰۰ هـ. ش
کابل: د افغانستان د علومو اکاډمي د رهبرۍ له خوا د ګران هېواد افغانستان د ملي بيرغ ورځ ونمانځل شوه.
په دې اړه د علومو اکاډمۍ په انګړ کې په ترسره شويو مراسمو کې د افغانستان د علومو اکاډمي سرپرست رئيس څېړنپوه دکتور عبدالظاهر شکيب، د اکاډمۍ معاونينو او رئيسانو برخه اخيستې وه.
د علومو اکاډمي عمومي رئيس دکتور شکيب ټولو هېوادوالو ته د دې پرتمینې ورځې مبارکي ویلو ترڅنګ وویل: د هر ملت تاریخ د هغوی پر بیرغ ژوندی وي، زموږ ملي بیرغ زموږ د یووالي، عزت، شرف، ملي حاکمیت او ملي هویت نښه ده.
ده زياته کړه، دا ورځ موږ بايد په ځانګړو ولولو او احساساتو ونمانځو، ځکه د افغانستان درې رنګه ښکلی بیرغ زموږ د ملي هويت، تاريخ او وياړليو حماسو سیمبول دی. د خپل بيرغ ساتنه او پالنه زموږ ملي وجيبه ده.
د يادولو ده چې په افغانستان کې بيرغ له ډېر پخوا څخه پېژندل شوی، دود شوی او پر کېږديو او ماڼيو رپول شوی دی چې تاريخچه يې ډېره لرغونې ده.
زموږ ملي بيرغ دې تل رپانده وي!