د ټاکنیزې مناظرې پېژندنه او څېړنه
«علمي- څېړنیز کنفرانس»
کابل: د ټاکنیزې مناظرې پېژندنې او څېړنې تر عنوان لاندې علمي- څېړنیز کنفرانس د روان ۱۳۹۹ لمریز کال د تلې میاشتې په ۷مه نېټه، د افغانستان د علومو اکاډمۍ د ژونالیزم انستیتوت علمي غړي څېړنیار عالم جان ژمن له خوا وړاندې شو.
نوموړی د کنفرانس د وړاندې کولو پرمهال وویل چې په ولسواکو نظامونو کې خلک خپل برخلیک په خپله ټاکي، د واک ورکولو او استازي ټاکلو صلاحیت ولس سره وي. له بلې خوا په داسې نظامونو کې رسنۍ بیا د څلورمې قوې حیثیت لري او همدا رسنۍ دي چې د ملت او دولت ترمنځ ارتباطي پل دی؛ نو اړینه ده چې رسنۍ د معیارونو او اصولو په رڼا کې ټاکنیزې مناظرې ترسره کړي او د نوماندانو له ډلې مناسب کاندید معلوم او ولس ته د پرېکړې کولو چاره اسانه کړي.
ښاغلي ژمن د مناظرې د منل شویو اصولو او قواعدو معرفي کړل او زیاته یې کړه چې د مناظرې کوربه رسنۍ او خبریالان دې په ټاکنیزو مناظرو کې؛ د څنګه او څه ډول په پوښتنو سره د کاندیدانو راتلونکي پلانونه د شعار، ادعا، خیالي چوکاټونو او اندازونو څخه را وباسي او د هغوی پلانونه د تحقق په واقعي پلان بدل کړي.
په دې کنفرانس کې د ټاکنیزې مناظرې پېژندنه، د رسنیزې مناظرې ډولونه، د ټاکنیزې مناظرې منل شوي اصول او قواعد، د ټاکنیزې مناظرې ځانګړتیاوې، د ټاکنیزو مناظرې پروګرام چلوونکي خبریال ځانګړتیاوې، د ټاکنیزې مناظرې ګټې، د مناظرې موخه او په افغانستان کې د ټاکنیزې مناظرې پیلېدل او څرنګوالی یې هر اړخیزې خبرې او بحث وشو.
په پای کې ښاغلي ژمن وویل، د هېواد په رسنیو کې د یوې واقعې او باکیفیته ټاکنیزې مناظرې لپاره دې د جمهوري ریاست کاندیدان په خپله لومړنۍ ټاکنیزه مناظره کې ملت ته خپل پلانونه معرفي کړي او بیا دې کاندیدان د اخلاقي اصولو په اډانه او د یو بل شخصت ته په پوره درناوي د خپلو سیالانو پلانونه دې د حقوقي دلایلو، عیني حقایقو، موجوده شرایطو او امکاناتو په اساس نقد کړي.
