د لغمان ولایت مرکز مهترلام اړوند د بېلابېلو کلیو په کرنیزو ځمکو کې د سلفر د کچې څېړل

د افغانستان د علومو اکاډمي، د طبیعي – تخنیکي علومو معاونیت، د کرنې انسټيټوټ علمي غړي څېړنوال خلیل الرحمن بارکزي له خوا د (د لغمان ولایت مرکز مهترلام اړوند د بېلابېلو کلیو په کرنیزو ځمکو کې د سلفر د کچې څېړل) تر سرلیک لاندې علمي – څېړنیز کنفرانس وړاندې کړ.

ښاغلي بارکزي وويل چې: سلفر یو له څلورو ضروري عناصرو څخه دی او د نباتاتو لپاره د نایتروجن (N)، فاسفورس (P) او پوتاشیم (K) څخه وروسته څلورم ضروري عنصر ګڼل کېږي همدارنګه د نباتاتو د عادي ودې لپاره د فاسفورس په اندازه اړین عنصر دی. نباتات خپل سلفر اکثراً د سلفیت (SO4-2) په ډول جذبوي. همدارنګه نباتات لږ سلفر د سلفایت (SO2-2) په ډول هم اخلي. دا چې سلفر د نباتاتو د ودې، حاصل او د کیفیت لپاره ډېر اړین عنصر دی د افغانستان علومو اکاډمۍ د کرنې انستیتوت د کنفرانسونو په کلني پلان کې یاده موضوع شامله کړه او د کنفرانس په بڼه یې ماته د څېړلو لپاره راوسپارله تر څو په اړه یې څېړنه تر سره کړم.

د دې څېړنې لپاره د لغمان ولایت د مرکز اړوند ۳۰ کلیو څخه د زیګزاګ په بڼه د خاورو نمونې راټولې شوي او د کرنې، اوبو لګولو او مالدارۍ وزارت د خاورې پوهنې په لابراتوار کې تجزیه شوي دي. د څېړنې د لاسته راغلو ارقامو څخه څرګندېږي چې د لغمان د مرکز په خاورو کې د ګلکاریو په کلي کې د فاسفورس کچه PPm 4.06 تر ټولو کمه ده او د شمنګل په کلي کې تر ټولو ډېره PPm 19.63 ده.

په څېړنه کې څرګنده شوې چې په یاده سیمه کې له 30 کلیو څخه په 18 کلیو کې چې 60 سلنه کېږي د سلفر کچه له سټنډرډ 8 PPM څخه کمه ده.

په پای کې ښاغلي بارکزي د څېړونکو او استادانو پوښتنو ته ځوابونه وویل او یاد کنفرانس د ارزونې کمیسیون لخوا مثبت وارزول شو.