«په پښتو کې د مسجع نثر د پيدايښت او پايښت څېړنه» علمي پروژه دفاع شوه

د افغانستان د علومو اکاډمي د ژبو او ادبیاتو مرکز د پښتو ژبې او ادبیاتو انستيتيوت علمي غړي څېړنوال محمد اصف احمدزي د څېړنپوهۍ (سرمحققۍ) علمي رتبې ته د لوړاوي لپاره له خپلې علمي- څېړنيزې پروژې (په پښتو کې د مسجع نثر د پيدايښت او پايښت څېړنه) څخه دفاع وکړه.

نوموړي د موضوع په تړاو پر مخکينيو کارونو رڼا واچوله، بیا يې د نثر پر پېژندنې او د پښتو نثر پرمختيايي بهير د څېړلو ترڅنګ د مسجع نثر پر پېژندنې او د هغه د پيدايښت پر څرنګوالي، موخې، د سجعې حمايت او مخالفت، ډولونو، ځانګړتياوو بحث وکړ او هم يې د نثر له نورو انواعو سره د مسجع نثر توپيرونه جوت کړل. دغه راز يې په عربي او دري ژبو کې د سجعې بهیر ته کتنه وکړه.

نوموړي په پښتو ادب کې د مسجع نثر تاريخي بهير بیان کړ، په پښتو ادب کې د مسجع نثر پر پيلېدو، خپرېدو او پرمختيا بحث وکړ او هم يې په پښتو کې د مسجع نثر ایجادوونکي په ډاګه کړل، بيا يې د عربي او دري ژبو له ځينو مسجع نثرونو سره د پښتو مسجع نثرونو پرتلنه وکړه.

څېړونکي په پښتو ادب کې په مسجع نثر د ليکل شوو آثارو تحليلي څېړنه او ارزونه وکړه. بيا يې د خيرالبیان او مخزن الاسلام د مسجع نثرونو پرتليز جاج واخیست او هم يې د دروېزه د پيروانو او ځينو نورو مسجع نثر ليکونکو د آثارو د ژبني اړخ پرتلنه وکړه.

ښاغلي احمدزي په دولسمه او ديارلسمه هجري پېړۍ کې د مسجع نثر ليکنې پرمختيايي بهير وڅېړه، د ديارلسمې هجري پېړۍ په وروستيو کې د مسجع نثر ليکنې د بهير د رکود عوامل يې بیان کړل او په پای کې يې په پښتو معاصر ادب کې د مسجع نثر څرنګوالی جوت کړ او پر نیمګړتياوو یې بحث وکړ.

ياده شوې دفاع د ټاکل شوي کميسیون له خوا مثبت وارزول شوه او ښاغلی څېړنوال محمد اصف احمدزی يې د څېړنپوه (سرمحقق) علمي رتبې ته لوړېدو مستحق وباله.